ကရင်နီ(ကယား)ပြည်နယ် ဖရူဆိုမြို့နယ်ဘက်မှ ဒီးမော့ဆိုမြို့နယ်ဘက်သို့စစ်ကြောင်းထိုးလာသည့် စစ်ကောင်စီတပ်ကို ကရင်နီပူးပေါင်းတပ်ဖွဲ့မှ တိုက်ခိုက်ခဲ့ရာ စစ်ကောင်စီတပ်ဘက်မှ ၁၄ဦးသေဆုံးပြီး ငါးဦးထိခိုက်ဒဏ်ရာရရှိခဲ့ကြောင်း KNDFက ထုတ်ပြန်သည်။
ဒီးမော့ဆိုမြို့နယ် ထူလွှီးဘီလာကျေးရွာအနီး သဲတောင်တွင် ယနေ့(ဇန်နဝါရီ ၃ရက်)နံနက် ၁၀နာရီခွဲမှ စတင်ခဲ့သည့် တိုက်ပွဲမှာည ၇နာရီထိ ၉နာရီနီးပါး ကြာမြင့်ခဲ့ကြောင်း၊ ကရင်နီတပ်မတော်(KA) နှင့် KNDF ပူးပေါင်းတပ်မှ ထိခိုက်ဒဏ်ရာရမှု မရှိကြောင်း ဖော်ပြထားသည်။
ဒီးမော့ဆိုမြို့ ငွေတောင်ဆည်အနီးတွင် ဒီဇင်ဘာ၃၁ ရက်မှ ယနေ့ အထိအကြမ်းဖက်စစ်ကောင်စီတပ်များကို PDF ပူးပေါင်းမဟာမိတ် တပ်ဖွဲ့နှင့်အတူ KNDF မှဆက်လက်ခုခံ တိုက်ခိုက်ခဲ့သဖြင့် တိုက်ပွဲပြင်းထန်ခဲ့ပြီး စစ်ကောင်စီတပ်များ ဘက်မှ အထိအခိုက် ရှိနိုင်သည်ဟုလည်း ထုတ်ပြန်သည်။
ယမန်နေ့(ဇန်နဝါရီ ၂ရက်)တိုက်ပွဲတွင်လည်း စစ်ကောင်စီတပ်မှ ၃ဦးသေဆုံးခဲ့ပြီး ကရင်နီတပ်မတော်မှ ရဲဘော်တစ်ဦး၊ PDF ပူးပေါင်းမဟာမိတ်တပ်ဖွဲ့မှ ရဲဘော်တစ်ဦးကျဆုံးခဲ့ကြောင်း ဖော်ပြထားသည်။
Public Service Announcement
တိုက်ပွဲတွင် ကျဆုံးခဲ့ရသော ကရင်နီတပ်မတော်နှင့် PDF မှ ရဲဘော်နှစ်ဦးကို အာဇာနည် သူရဲကောင်းများအဖြစ် သမိုင်းမှတ်တမ်းတင် အလေးပြုကြောင်း KNDFက ဆိုသည်။
