မှော်ဘီမြို့နယ်တွင် အာဏာသိမ်းစစ်ကောင်စီက ဦးစီးကျင်းပသည့် လွတ်လပ်ရေးနေ့ အထိမ်းအမှတ်ဘောလုံးပွဲကို ဗုံးဖောက်ခွဲ၍သတိပေးခဲ့သောကြောင့် ပွဲပျက်သွားကြောင်း အာဏာသိမ်းဆန့်ကျင်ရေးနှင့်ပြည်သူ့လွတ် မြောက်ရေးအဖွဲ့က သတင်းထုတ်ပြန်သည်။
မှော်ဘီမြို့နယ် ယင်းတိုက်ပင်ကျေးရွာအုပ်စု သဲဖြူကျေးရွာ၌ ယနေ့(ဇန်နဝါရီ ၄ ရက်) လွတ်လပ်ရေးနေ့ အထိမ်းအမှတ် ဘောလုံးပြိုင်ပွဲပြုလုပ်ခဲ့ခြင်းဖြစ်သည်။
ပြည်သူများထိခိုက်မှုမရှိစေရန် အသံဗုံးတစ်ကြိမ် ဖောက်ခွဲပြီးနောက် ၁၀မိနစ်ခန့်အကြာတွင် တိုက်ခိုက်ရေးဗုံးတစ်ကြိမ်ထပ်မံဖောက်ခွဲခဲ့ကြောင်း အထက်ပါအဖွဲ့ကထုတ်ပြန်သည်။
“ဒုတိယဗုံးဖြင့်တိုက်ခိုက်မှုတွင် စစ်ကောင်စီတပ်ဖွဲ့ဝင်များမှာပြည်သူများနှင့်ရောနေ၍ထိခိုက်မှုမရှိသော်လည်း ဘောလုံးပွဲကိုဖျက်၍ ကြောက်လန့်တကြားထွက်ပြေးသွားခဲ့သောကြောင့် ကျွန်ုပ်တို့အနေဖြင့် ထပ်မံတိုက်ခိုက်ရန်စီစဥ်ထားရှိမှုများကိုဖျက်သိမ်းခဲ့ရသည် “ဟု အဆိုပါအဖွဲ့က ထုတ်ပြန်ထားသည်။
Public Service Announcement
လက်ရှိကာလသည် အာဏာရှင်ဆန့်ကျင်ရေး ပြည်သူ့ခုခံစစ်ဆင်နွဲနေသည့်ကာလဖြစ်သောကြောင့် ပြည်သူများအနေဖြင့် စစ်ကောင်စီအဖွဲ့က ကျင်းပသည့် အခမ်းအနားများကို ရှောင်ကျဥ်ခြင်းဖြင့် တော်လှန်ရေးပါဝင်ကူညီပေးကြရန် မေတ္တာရပ်ခံထားသည်။
ယင်းစစ်ဆင်ရေးကို အာဏာသိမ်းဆန့်ကျင်ရေးနှင့်ပြည်သူ့လွတ်မြောက်ရေးအဖွဲ့က မှော်ဘီ့ရင်သွေးတပ် (Hmawbi Youth Army)၊ မှော်ဘီမြို့နယ်ပြည်သူ့ကာကွယ်ရေးတပ်ဖွဲ့ (People Defence Force- Hmawbi) တို့နှင့် ပူးပေါင်းလုပ်ဆောင်ခဲ့ခြင်းဖြစ်သည်။
