အင်းတော်တွင် KIA/PDF ပူးပေါင်း တိုက်ခိုက်၍ စစ်ကောင်စီတပ်မှ အရာရှိအပါအဝင် ၂၄ဦးသေဟု ထုတ်ပြန်

ဇန်နဝါရီ ၃ရက် မွန်းလွဲ ၁နာရီ ၄၀ မိနစ်တွင် မြစ်ကြီးနားမှ မန္တလေးမြို့ဘက်သို့ ထွက်ခွာလာသည့် စစ်ကောင်စီတပ် ယာဉ်တစ်စီးကို အင်းတော်မြို့နယ် စီပိန်းရွာနှင့် ဖားပန့် ရွာအကြားတွင် KIA/IPDF တပ်ဖွဲ့ဝင်များက စောင့်ကြို တိုက်ခိုက်ခဲ့ကြောင်း၊ စစ်ကူပေးရန် စီပိန်းကျေးရွာမှ ထပ်ဆင်းလာသော စစ်ကားတစီးကိုလည်း စောင့်ကြိုပြင်ဆင်ထားသည့် KIA နှင့် PDF ပူးပေါင်းအဖွဲ့မှ လမ်းခုလတ်တနေရာတွင် ထပ်မံပစ်ခတ် တိုက်ခိုက်ခဲ့ရာ အရာရှိတစ်ဦးအပါအဝင် ၂၄ဦး သေဆုံးပြီးအများအပြား ဒဏ်ရာရရှိခဲ့သည်ဟု ဖော်ပြသည်။

အဆိုပါ တိုက်ခိုက်မှုတွင် KIA/PDF ပူးပေါင်းတပ်ဖွဲ့ဝင်များ အထိအခိုက် မရှိအောင်မြင်စွာဆုတ်ခွာနိုင်ခဲ့ကြောင်း၊ တိုက်ခိုက်ခဲ့သည့် ပထမစစ်ကားမှာ သုံးမရအောင် ပျက်စီးသွားပြီး လမ်းဘေး၌ ပစ်ထားခဲ့ရကြောင်း၊ စစ်ကူလိုက်လာသောကားမှ စစ်ကောင်စီတပ်ဖွဲ့ဝင်များသည် လက်နက်ကြီးများဖြင့် ပတ်ဝန်းကျင်သို့ ရမ်းသမ်းပစ်ခတ်ခဲ့ပြီး အလောင်းများတင်ဆောင်ကာ ထွက်ခွာသွားကြောင်း ထုတ်ပြန်ခဲ့သည်။

အဆိုပါ တိုက်ခိုက်မှုကို KIAနှင့်IPDF ပူးပေါင်းတပ်ဖွဲ့မှ အင်အား၄၀ဖြင့် ဆောင်ရွက်ခဲ့ခြင်းဖြစ်သည်ဟု ဆိုသည်။