တနင်္သာရီတိုင်း၊ သရက်ချောင်းမြို့နယ်၊ စော်ဖျားရွာအနီးတွင် အကြမ်းဖက်စစ်ကောင်စီတပ်နှင့် ဒေသခံပြည်သူ့ကာကွယ်ရေးတပ်ဖွဲ့တို့ တိုက်ပွဲဖြစ်ပွားနေကြောင်း ဒေသခံကာကွယ်ရေးတပ်များနှင့် ဒေသခံများကပြောသည်။
စော်ဖျားရွာတွင် တပ်စွဲထားပြီး လူထုကို အနိုင်ကျင့်နှိပ်စက်နေသည့် အကြမ်းဖက်စစ်ကောင်စီ တပ်များကို ဒေသခံ ပြည်သူ့ကာကွယ်ရေးတပ်များက ယနေ့ မနက် ၉နာရီကျော်တွင် ဝင်ရောက်တိုက်ခိုက်ခဲ့ခြင်းကြောင့် တိုက်ပွဲဖြစ်ပွားနေခြင်းဖြစ်သည်ဟု ဒေသခံများထံမှ သိရသည်။
တိုက်ပွဲအတွင်း စစ်ကူလာသည့် အကြမ်းဖက်စစ်ကောင်စီ စစ်ကားနှစ်စီးကို ဒေသခံကာကွယ်ရေးတပ်များက မိုင်းဆွဲတိုက်ခိုက်ခဲ့ပြီး စစ်ကောင်စီတပ်ဘက်မှ အကျအဆုံးများခဲ့သည်ဟု ဒေသခံကာကွယ်ရေးတပ်ဖွဲ့နှင့်နီးစပ်သူများကပြောသည်။
စစ်ကောင်စီတပ်များက လက်နက်ကြီးများအပါအဝင် စစ်လက်နက်များဖြင့် အင်အားဖြည့်တင်းနေပြီး နေလယ်ပိုင်းတွင် ထားဝယ်မြို့မှ စစ်ကားများပါ စော်ဖျားရွာသို့ စစ်အင်းအားဖြည့်တင်းရန် ပြင်ဆင်နေသည်ဟု ဒေသခံများကပြောသည်။ တိုက်ပွဲကြောင့် ရွာသားက ထွက်ပြေးခဲ့ရပြီး အကြမ်းဖက်စစ်ကောင်စီတပ်များက ရွာသားများကိုပါလိုက်လံပစ်ခတ်နေသည်။
Public Service Announcement
“အခုတော့ ဘေးလွတ်ရာကိုပြေးနေရတယ်၊”ဟု ဒေသခံတစ်ဦးကပြောသည်။
ဒေသခံကာကွယ်ရေးတပ်ဖွဲ့များက ထားဝယ်-သရက်ချောင်း အဝေးပြေးလမ်းမကြီးကို သွားလာခြင်းမပြုလုပ်ရန်ဒေသခံကာကွယ်ရေးတပ်ဖွဲ့များက မေတ္တာရပ်ခံထားသည်။
စစ်ကောင်စီတပ်က နယ်မြေရှင်းလင်းရေးအကြောင်းပြချက်ဖြင့် သရက်ချောင်းမြို့နယ်၊ တောင်ပျောက်ဒေသကို ဒီဇင်ဘာ ၂၃ ရက်ကတည်းကပိတ်ဆို့ စစ်အင်အားတိုးထားပြီး ရိက္ခာဖြတ်တောက်ထားသည်။ တောင်ပျောက်ဒေသအတွင်း ကျေးရွာ ၁၀ခန့်ရှိပြီး ရွာသားများကိုပါ ရိက္ခာဝယ်ယူခွင့်မပေးဘဲ ပိတ်ဆို့ထားခြင်းဖြစ်သည်။ ထိုသို့ ပိတ်ဆို့ထားသည့် ကာလအတွင်း ရွာသားများကို ဖမ်းဆီးခြင်း၊ ကား၊ဆိုင်ကယ်၊ စသည့် အဖိုးတန်ပစ္စည်းများ ခိုးယူခြင်းနှင့် နေအိမ်ဖောက်ထွင်းမူများကို ပြုလုပ်ခဲ့ကြသည်။
