▪️စစ်ကောင်စီလက်ပါးစေများ၏ လက်ချက်ဖြစ်နိုင်ဟု ဒေသခံများပြော
ရန်ကုန်မြို့ ဒဂုံမြို့သစ်အရှေ့ပိုင်းမြို့နယ်ရှိ အမှိုက်ပုံတစ်ခုတွင် ပေါက်ကွဲမှုဖြစ်ပွားပြီး အမှိုက်ကောက်သည့် သားအဖနှစ်ဦး ဗုံးထိမှန်ခဲ့ကြောင်း ဒေသခံများက ပြော သည်။
ယနေ့(ဇန်နဝါရီ ၈)နံနက် ၈ နာရီခန့်တွင် ဒဂုံမြို့သစ်အရှေ့ပိုင်းမြို့နယ် ကျန်စစ်သားလမ်းပေါ်ရှိ အမှိုက်ပုံတစ်ခုတွင် ပေါက်ကွဲမှုဖြစ်ပွားခဲ့ခြင်းဖြစ်ပြီး ဗုံးထိမှန်ခဲ့သောသားအဖနှစ်ဦးတွင် သားဖြစ်သူသေဆုံးသွားသည်ဟု ဒေသခံများက ပြောသည်။
“မနက်က အမှိုက်ပုံမှာ ဗုံးပေါက်တယ်ဆိုတာ ဟုတ်ပါတယ်ရှင့်။ အမှိုက်ကောက်တဲ့ သားအဖနှစ်ယောက်မှာ သားက ဗုံးထိမှန်သေဆုံးသွားပါတယ်”ဟု ဒဂုံမြို့သစ်အရှေ့ပိုင်းမြို့နယ်မှ ပရဟိတအသင်းတာဝန်ရှိသူတစ်ဦးက အတည်ပြုသည်။
Public Service Announcement
အမှိုက်ကောက်သည့် သားအဖနှစ်ဦးသည် အမှိုက်ပုံတွင်တွေ့ရသည့် အထုပ်မဲတစ်ထုပ်ကိုဖွင့်ကြည့်စဥ် ပေါက်ကွဲမှုဖြစ်ကာ သားဖြစ်သူမှာ နေရာတင်ပွဲချင်းပြီးသေဆုံး၍ ဖခင်ဖြစ်သူမှာလည်း ပြင်းထန်ဒဏ်ရာရရှိခဲ့ကြောင်း ဒေသခံများက ဆိုသည်။
အထက်ပါပေါက်ကွဲမှုဖြစ်စဥ်မှာ မည်သည့်အဖွဲ့အစည်းက လုပ်ဆောင်သည်ကိုမသိရသေးဘဲ ဒေသခံများကမူ ပြည်သူထိခိုက်အောင်လုပ်ဆောင်သည်မှာ စစ်ကောင်စီ ၏လက်ပါးစေများ၏ လက်ချက်ဖြစ်နိုင်ကြောင်း မှတ်ချက်ပေးကြသည်။
စစ်ကောင်စီလက်ပါးစေများသည် ပြီးခဲ့သည့် လပိုင်းများကလည်း ပြည်သူများက PDFများအား အထင်လွဲမှားမှုဖြစ်စေရန် အမှိုက်ကောက်သည့် ကလေးငယ်အချို့ ထိခိုက်မှုရှိစေရန် အမှိုက်ပုံးများ၌ ဗုံးထားရှိ၍ ဖောက်ခွဲမှုများ ပြုလုပ်ခဲ့သည်ဟု ရန်ကုန်မြို့နေ ဒေသခံတစ်ဦးက ပြောသည်။
