ဒဂုံမြို့သစ်အရှေ့ပိုင်းမြို့နယ်ရှိ ဆေးရုံတစ်ရုံတွင် အစောင့်ကင်းချထားသည့် စစ်ကောင်စီတပ်သားများအား ဗုံးပစ်တိုက်ခိုက်ခဲ့ကြောင်း Human Rights Defenders(HRD)က ထုတ်ပြန်သည်။
အဆိုပါတိုက်ခိုက်မှုကို ယမန်နေ့(ဇန်နဝါရီ ၈)ညနေ ၆ နာရီ ၂၇ခန့်တွင် တစ်ကြိမ်၊ ၆ နာရီ ၃၃တွင် တစ်ကြိမ်ဖြင့် ဗုံးသီးနှင့် နှစ်ကြိမ်ပစ်ခတ်တိုက်ခိုက်ခဲ့ခြင်းဖြစ်ကြောင်း ထုတ်ပြန်ချက်တွင် ဖော်ပြသည်။
ပထမအကြိမ် ဗုံးပစ်တိုက်ခိုက်ခံရခြင်းကြောင့် အရှေ့ဒဂုံ (၉)ရပ်ကွက် အနော်ရထာလမ်းနှင့် ရာဇဓိရာဇ် လမ်းထောင့်ရှိ ဆေးရုံနေရာသို့ စစ်ကူလာသော စစ်ကောင်စီတပ်အား ဒုတိယအကြိမ် ဗုံးပစ်တိုက်ခိုက် ခဲ့ခြင်းဖြစ်သည်ဟု HRD က ဆိုသည်။
“အသံကျယ်တယ်။ ၁၃၃ ရပ်ကွက်ထိပ်လောက်ကအထိ ကြားရယ်။ နှစ်လုံးသုံးလုံးပဲ။ စခဘက်က နှစ်ယောက်ထိ တယ်လည်းပြောတယ်။ သေချာတော့ မသိဘူး”ဟု ဒဂုံမြို့သစ်အရှေ့ပိုင်းမှ မြို့ခံတစ်ဦးက ပြောသည်။
တိုက်ခိုက်ခံရမှုကြောင့် စစ်ကောင်စီတပ်မှ တစ်ဦးသေဆုံးပြီး နှစ်ဦးထိခိုက်ဒဏ်ရာရရှိကာ လမ်းမတန်းများကို လျှပ်စစ်မီးဖြတ်တောက်ထားခဲ့ကြောင်း ဒေသတင်းရင်းမြစ် NDEDI က ဖော်ပြသည်။
HRD နှင့် မဟာမိတ်တပ်ဖွဲ့ဝင်များသည် ယမန်နေ့က မြောက်ဒဂုံ (၄၂) ရပ်ကွက်ရှိ KBZ ဘဏ်အနီး မိုင်းတစ်လုံးထောင်ထားခဲ့ရာ စစ်ကောင်စီတပ်များတွေ့ရှိပြီး ဖယ်ရှားခဲ့ခြင်းကြောင့် ဖောက်ခွဲနိုင်ခြင်းမရှိခဲ့ဟု အသိပေးထားသည်။
အထက်ပါတိုက်ခိုက်မှုကို Human Rights Defenders(HRD)နှင့် Generation Z Defence Force(GZDF)တို့ ပူးပေါက်လုပ်ဆောင်ခဲ့ခြင်း ဖြစ်သည်။