အာဏာသိမ်းစစ်ကောင်စီကမော်လမြိုင်မြို့အနီးတွင် နိုင်ငံတကာအဆင့်မှီ အပြည်ပြည်ဆိုင်ရာဆိပ်ကမ်း တစ်ခုနှင့် လေယာဉ်ကွင်းအသစ် တစ်ခု တည်ဆောက်ရန် ကြီးကြပ်မူကော်မတီကို ဖွဲ့စည်းလိုက်ကြောင်း နိုင်ငံတော်ပြန်တမ်းထုတ်ပြန်ချက်တွင်ဖော်ပြထားသည်။
ထိုစီမံကိန်းအကောင်အထည်ဖော်ရေးကြီးကြပ်မူဗဟိုကော်မတီကို အကြမ်းဖက်စစ်ကောင်စီက ခန့်အပ်ထားသည့် ဝန်ကြီး ၇ ဦးအပါအဝင် ၁၄ ဦးဖြင့် ၂၀၂၁ ဒီဇင်ဘာ ၁၀ ရက်တွင် ဖွဲ့စည်းထားသည်ဟုပါရှိသည်။
ထိုကော်မတီတွင် အကြမ်းဖက်စစ်ကောင်စီကခန့်အပ်ထားသည့် ပို့ဆောင်ရေးနှင့် ဆက်သွယ်ရေးဝန်ကြီးက ဥက္ကဌဖြင့်ဆောင်ရွက်ပြီး စစ်ကောင်စီလက်အောက်ခံဝန်ကြီး၊ ဒုဝန်ကြီးနှင့် အခြားဌာနဆိုင်ရာများပါဝင်သည်။ ထိုအပြင်စစ်အင်ဂျင်နီယာညွန့်ကြားရေးမှူးရုံးက ညွန့်ကြားရေးမှူးလည်း အဖွဲ့ဝင်အဖြစ်ပါဝင်သည်ဟုဆိုသည်။
အဆိုပါစီမံကိန်းများနှင့်ပတ်သတ်ပြီး မည်သည့်နိုင်ငံဖြင့်ဆောင်ရွက်မည်ကို အကြမ်းဖက်စစ်ကောင်စီက ထုတ်ပြန်ကြေညာခြင်းမရှိသေးပေ။
သို့သော်မွန်ပြည်နယ် ၊မော်လမြိုင်တွင် မြန်မာ့နိုင်ငံ၏ အထူးစီးပွားရေးဇုန်စီမံကိန်းကြီး တစ်ခုကို ဖော်ဆောင်မည်ဟု နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ၂၀၂၀ ဇူလိုင် ၂၉ ရက်က ဗီဒီယိုကွန်ဖရင့်ဖြင့် ကျင်းပသည့် ‘Myanmar-Japan Investment Dialogue’ တွင် ဗီဒီယိုဖြင့်သတင်းစကား ပြောကြားစဉ် ထည့်သွင်းပြောခဲ့ဖူးသည်။ ထိုစီမံကိန်းကို ဂျပန်ပြည်ပကုန်သွယ်ရေးအဖွဲ့ (JETRO)က ဦးဆောင်အကောင်အထည်ဖော်ခွင့်ရရှိမည်ဟု ထိုစဥ်ကသိရှိထားသည်။ အရပ်သားအစိုးရလက်ထက်တွင် တင်ဒါခေါ်ရန် စီစဉ်နေချိန်တွင် အကြမ်းဖက်စစ်တပ်က နိုင်ငံတော်အာဏာကို လုယူလိုက်ခြင်းကြောင့် စီမံကိန်း ရပ်တန့်ခဲ့ခြင်းဖြစ်သည်။
သို့သော်ယခုစီမံကိန်းတွင် JETRO ပါဝင်ခြင်းရှိ၊မရှိကို လူထုနွေဦးသတင်းဌာနက အတည်မပြုနိုင်သေးပါ။
အမျိုးသားညီညွတ်ရေးအစိုးရ(NUG)က အာဏာသိမ်းစစ်ကောင်စီလက်အောက်တွင် နိုင်ငံအာဏာကိုအတင်းအဓ္ဓလုယူပြီး MIC ကိုလည်းစစ်ကောင်စီအလိုကျပုဂ္ဂိုလ်များဖြင့်ဖွဲ့စည်းလိုက်၍ ဖေဖော်ဝါရီ ၁ ရက်မှစ၍ ဆောင်ရွက်သော စီမံကိန်းများ၊ပြည်ပရင်းနှီးမြှပ်နှံမှုများသည် တရားမဝင်ကြောင်း ထုတ်ပြန်ထားသည်။
အာဏာသိမ်းစစ်ကောင်စီက နိုင်ငံခြားငွေလိုအပ်ခြင်း၊ နိုင်ငံတကာ၏ထောက်ခံမှုလိုအပ်ခြင်းနှင့်စီမံလုပ်ကိုင်နိုင်သည်ဟု ဝါဒဖြန့်နိုင်ရန် ပြည်ပရင်းနှီးမြှပ်နှံမှုများကို အသည်းအသည် လိုလားနေသည်။ နိုင်ငံတကာမှ လူ့အခွင့်အရေးနှင့်ဒီမိုကရေစီလိုလားသော ကုမ္ပဏီများက မြန်မာနိုင်ငံမှ လုပ်ငန်းများရုတ်သိမ်းသွားကြသည်။ကျန်နေသောသော ကုမ္ပဏီနှင်လုပ်ငန်းများကိုအာဏာသိမ်း
စစ်ကောင်စီလက်အောက်တွင်မလုပ်ရန်အရပ်ဖက်အဖွဲ့အစည်းများ ၊အစိုးရများကဖိအားပေးနေသည်။
အာဏာသိမ်းစစ်ခေါင်းဆောင်က အာဏာသိမ်းပြီးစကတည်းက လျှပ်စစ်ရထားများ၊လျှပ်စစ်ကား၊မြေအောက်ရထားစီမံကိန်းများပြုလုပ်မည်ဟု လှည့်လည်ပြောဆိုခဲ့သည်။သို့သော် နိုင်ငံတစ်ဝန်းမီးများပျက်တောက်နေပြီးယခုနောက်ပိုင်း ထိုသို့ပြောကြားခြင်းနည်းလာသည်ကိုတွေ့ရသည်။