မတူပီ – ပလက်၀လမ်းအခြေစိုက် ထယ်ဘွေးတပ်စခန်းရှိ အကြမ်းဖက် စစ်ကောင်စီတပ်ဖွဲ့ဝင်များကို ယနေ့ ညနေပိုင်းတွင် စနိုက်ပါဖြင့် သွားရောက်ပစ်ခတ်ခဲ့ရာ စစ်ကောင်စီတပ်ဖွဲ့ဝင် နှစ်ဦးထပ်မံ သေဆုံးခဲ့ကြောင်း မတူပီ ချင်းကာကွယ်ရေးတပ်ဖွဲ့(CDF)က ထုတ်ပြန်သည်။
အဆိုပါ တိုက်ခိုက်မှုတွင် CDFဘက်က အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်း ဖော်ပြထားသည်။
မတူပီ CDFသည် အဆိုပါ ထယ်ဘွေးတပ်စခန်းကို ဇန်နဝါရီ ၃ရက်က စတင်ပြီး ငါးကြိမ်ထက်မနည်း တိုက်ခိုက်ခဲ့ရာ စစ်ကောင်စီတပ်မှ သေဆုံးထိခိုက်မှု များပြားခဲ့သည်။ ထို့ပြင် မတူပီ -ဟားခါးလမ်း၌လည်း CDFနှင့် စစ်ကောင်စီအကြား တိုက်ပွဲများ ဖြစ်ပွားခဲ့သည်။
တိုက်ပွဲအတွင်း စစ်ကောင်စီတပ်က အရပ်သားများကို ဖမ်းဆီးပြီး လူသားဒိုင်းအဖြစ်အသုံးပြု၊ သတ်ဖြတ်မှုများ လုပ်ဆောင်ခဲ့ရာ အရပ်သား၁၀ဦး သေဆုံးခဲ့သည်ဟု CDFက ထုတ်ပြန်ထားသည်။
ယခုလဆန်းမှစ၍ မတူပီမြို့နယ်အတွင်း၌ တိုက်ပွဲများဖြစ်ပွားနေခြင်းဖြစ်သည်။ လက်ရှိတွင်လည်း မင်းတပ်မှ မတူပီသို့ စစ်ကား ၉၀ကျော်ဖြင့် အင်အားဖြည့်တင်းနေကြောင်း အဆိုပါ စစ်ယာဉ်တန်းကို မင်းတပ် CDF က ချုံခိုတိုက်ခိုက်မှုများ လုပ်ဆောင်ခဲ့ရာ စစ်ကောင်စီတပ်မှ သေဆုံးထိခိုက်မှုများရှိခဲ့သည်ဟု ဆိုသည်။