ကရင်ပြည်နယ် ဖလူးဒေသရှိ ဒီမိုကရေစီအကျိုးပြုကရင့်တပ်မတော်(DKBA) တပ်စခန်းတစ်ခုကို စစ်ကောင်စီ တပ်က ယမန်နေ့ ညနေနှင့် ယနေ့(ဇန်နဝါရီ ၁၃)နံနက်ပိုင်းတွင် ထိုးစစ်ဆင် တိုက်ခိုက်ခဲ့၍ တိုက်ပွဲပြင်းထန်ခဲ့ ကြောင်း အဆိုပါဒေသရှိ ပြည်သူ့ကာကွယ်ရေးတပ်(PDF)စခန်းတစ်ခု၏ တာဝန်ရှိသူတစ်ဦးက ပြောသည်။
လေးကေ့ကော်ဒေသ တိုက်ပွဲပြင်းထန်စဉ် စစ်ဘေးရှောင်ပြည်သူများအား အကူအညီပေးခဲ့သည့် DKBA မှ ဗိုလ်စောစလုံး၏တပ်စခန်းကို စစ်ကောင်စီတပ်က ထိုးစစ်ဆင်တိုက်ခိုက်ခဲ့၍ စစ်ဘေးရှောင်များလည်း ထိုင်းဘက်သို့ ထပ်မံထွက်ပြေးတိမ်းရှောင်သွားရသည်ဟု ဆိုသည်။
“ဒီဘက်က KNLAကို စားနပ်ရိက္ခာတွေ ဖြတ်တောက်ဖို့ သူတို့နေရာယူတာထင်ပါတယ်။ အခုအချိန်ထိတော့ သူတို့ ကျူးကျော်လာတဲ့ ထိုးစစ်ဆင်လာတဲ့ စကစတွေ အကျအဆုံးတွေအများကြီးနဲ့ သူတို့ ပြန်ဆုတ်ရတာပဲရှိပါ တယ်”ဟု PDFစခန်း တာဝန်ရှိသူက ပြောသည်။
အဆိုပါ တိုက်ခိုက်မှု မပြုလုပ်မီက ဗိုလ်စလုံးစခန်းသို့ စစ်ကောင်စီလက်အောက်ခံ ကရင်နယ်ခြား စောင့်တပ်ဖွဲ့ (BGF)မှ တပ်ရင်းမှူး ဗိုလ်မုတ်သုန် နှင့် ဗိုလ်မှူးစောသန်းအောင်တို့ လာရောက်ခဲ့သည်ဟု ဆိုသည်။
DKBAသည် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ်(NCA) လက်မှတ်ထိုးထားသည့် အဖွဲ့ဖြစ်သကဲ့သို့ အာဏာသိမ်းပြီးနောက်ပိုင်း စစ်ကောင်စီတပ်ကို ခုခံတိုက်ခိုက်ခြင်း မပြုဘဲ ပြေလည်မှုရှိသည့် အဖွဲ့ဖြစ်သည်။
DKBA တပ်စခန်းတစ်ခု တိုက်ခိုက်ခံရမှုနှင့်ပတ်သက်ပြီး ယင်းအဖွဲ့၏ အရာရှိတစ်ဦးထံ သဘောထား မှတ်ချက် မေးမြန်းရာ စစ်ဌာနချုပ်တာဝန်ရှိသူထံ ဆက်သွယ်ရန် လမ်းညွှန်သည်။ထို့ကြောင့် DKBA စစ်ဌာနချုပ် တာဝန်ရှိသူထံ ဆက်သွယ်ရာအဆက်အသွယ်မရပေ။