-ယခင်တိုက်ပွဲများတွင်သေဆုံးခဲ့သည့် စစ်ကောင်စီတပ်ဖွဲ့ဝင်အလောင်းများကောက်သူမရှိ၍မီးရှို့သင်္ဂြိုလ်ပေးရပြန်
ကယားပြည်နယ် လွိုင်ကော်မြို့ မိုင်းလုံးရပ်ကွက်ရှိ နည်းပညာတက္ကသိုလ်အနီး တပ်စွဲထားသည့် စစ်ကောင်စီတပ်များကို ကရင်နီဒေသတော်လှန်ရေးပူးပေါင်းတပ်ဖွဲ့က တိုက်ခိုက်ခဲ့ရာ စစ်ကောင်စီတပ်မှ သေဆုံးထိခိုက်မှုရှိနိုင်သည်ဟု ကရင်နီအမျိုးသားကာကွယ်ရေးတပ်ဖွဲ့(KNDF)က ထုတ်ပြန်သည်။
ဇန်နဝါရီ၁၃ ရက် နံနက်ပိုင်းတွင် စစ်ကောင်စီတပ်ကို ကရင်နီတပ်မတော် (KA)၊ KNDF နှင့် ပြည်သူ့ကာကွယ်ရေးတပ်(PDF)ပူးပေါင်းမဟာမိတ်တပ်ဖွဲများမှ ပူးပေါင်းတိုက်ခိုက်ခဲ့ရာ တော်လှန်ရေးတပ်ဖွဲ့များဘက်က ထိခိုက်မှုမရှိဟု ဆိုသည်။
လွိုင်ကော်မြို့ ရွာတန်းရှည်နှင့် မိုင်းလုံးရပ်ကွက်တွင် ယခင်ရက်တိုက်ပွဲများအတွင်း သေဆုံးခဲ့ပြီး ကောက်ယူ သဂြိုလ်မည့်သူမရှိသော အကြမ်းဖက်စစ်ကောင်စီတပ်ဖွဲ့ဝင်များ၏ အလောင်းများကို KNDF နှင့် ပူးပေါင်းတပ်များမှ လူ့ဂုဏ်သိက္ခာနှင့်အညီ မီးရှို့သင်ဂြိုလ်ပေးခဲ့ကြောင်း ဖော်ပြထားသည်။
Public Service Announcement
ထို့အပြင် ဇန်နဝါရီ၁၁ရက်က ဘော်လခဲမြို့နှင့် နန်းဖဲကျေးရွာအကြားရှိ စစ်ကောင်စီ၏မက်စလောင်တောင်စခန်းကို ကရင်နီတပ်မတော် (KA) နှင့် KNDF တိုက်ခိုက်ခဲ့သည်ဟု ဆိုသည်။
အဆိုပါ တိုက်ပွဲသည် ၄၅မိနစ်ခန့်ကြာမြင့်ခဲ့ပြီး အကြမ်းဖက်စစ်ကောင်စီတပ်ဘက်မှ ထိခိုက်ကျဆုံးမှုများရှိခဲ့သော်လည်း အရေအတွက်ကို အတည်မပြုနိုင်ကြောင်း KNDFက ထုတ်ပြန်သည်။
ဓာတ်ပုံ – KNDF
