အကြမ်းဖက်စစ်ကောင်စီသည် ကျန်းမာရေးစောင့်ရှောက်မှုလုပ်ငန်း ၃၆၀ ခန့်ကို တိုက်ခိုက်ခဲ့သည့်အပြင် ကျန်းမာရေးလုပ်သား ၂၉၀ ဦးခန့်အားဖမ်းဆီးကာ ၃၁ ဦးကို သတ်ဖြတ်ခဲ့ကြောင်း အမျိုးသားညီညွတ်ရေးအစိုးရ(NUG)၊ ကျန်းမာရေးဝန်ကြီးဌာနက ထုတ်ပြန်သည်။
အဆိုပါအရေအတွက်မှာ ၂၀၂၁ ခုနှစ် ဖေဖော် ဝါရီ ၁ ရက် စစ်တပ်မှအာဏာသိမ်းပြီးချိန်မှ နို ဝင်ဘာလကုန်အထိ ၁၀ လတာကာလအတွင်း ကျူးလွန်ခဲ့သည့်စာရင်းဇယားများဖြစ်ကြောင်း နိုင်ငံတကာအဖွဲ့အစည်းများ၏ ထုတ်ပြန်ချက်များကိုကိုးကားပြီး NUG က ထုတ်ပြန်လိုက်ခြင်း ဖြစ်သည်။
ထိုစာရင်းများအရ ကျန်းမာရေးစောင့်ရှောက်မှုလုပ်ငန်း(၃၅၅)ခုကို တိုက်ခိုက်ခြင်း၊ ကျန်းမာ ရေးလုပ်သား (၂၈၄)ဦးကို ဖမ်းဆီးခြင်း၊ ဆေးရုံ/ဆေးခန်း (၁၁၃)ခုကို ဝင်ရောက်စီးနင်းလုယက်ခြင်းနှင့် ကျန်းမာရေးလုပ်သား (၃၁) ဦးကို သတ်ဖြတ်ခြင်းတို့အား ကျူးလွန်ခဲ့ကြောင်း Insecurity Insight ၊ Physicians for Human Rights (PHR)နှင့် The Johns Hopkins University Center for Public Health and Human Rights (CPHHR)အဖွဲ့တို့၏ ၂၀၂၁ ခုနှစ် ဒီဇင်ဘာ ၂၃ ရက်နေ့ ပူးတွဲထုတ်ပြန်ချက်ကို ကိုးကားဖော်ပြသည်။
ထို့အပြင် အကြမ်းဖက်စစ်ကောင်စီသည် ကချင်၊ ကယား/ကရင်နီ၊ ကရင်၊ ချင်း၊ မွန်၊ ရှမ်း၊ စစ်ကိုင်း၊ မကွေး၊ ပဲခူး၊ တနင်္သာရီ စသည့် ဒေသများမှ အပြစ်မဲ့ပြည်သူများကို အစုလိုက် အပြုံလိုက် မီးရှို့သတ်ဖြတ်ခြင်း၊ လေကြောင်းနှင့် လက်နက်ကြီးများအသုံးပြု၍ အရပ်သားများကို ရည်ရွယ်ချက်ရှိရှိ ပစ်ခတ်တိုက်ခိုက် ခြင်း၊ အိုးအိမ်ပစ္စည်းများကို မီးရှို့ဖျက်ဆီးလုယက်ခြင်း စသော အကြမ်းဖက်လုပ်ရပ်များကို လူစိတ်မဲ့စွာ ဆက်တိုက်ကျူးလွန်လျက်ရှိသည်ဟု ထုတ်ပြန်ချက်က ဆိုသည်။
Public Service Announcement
အဆိုပါလုပ်ရပ်များကြောင့် စစ်အာဏာသိမ်းသည့် ဖေဖော်ဝါရီ ၁ ရက်မှ ယခုနှစ် ဇန်နဝါရီ ၃ ရက်အထိ မြန်မာနိုင်ငံဒေသ အသီးသီးရှိ ပြည်သူ (၄)သိန်းနီးပါး နေရပ်စွန့်ခွာ၍ စစ်ဘေးရှောင်ရကြောင်း UNHCR ၏အစီရင်ခံစာကိုကိုးကားပြီး NUG က ထုတ်ပြန်သည်။
ထို့ကြောင့် NUG ၏ကျန်းမာရေးဝန်ကြီးဌာနသည် အကြမ်းဖက်စစ်ကောင်စီ၏ လုပ်ရပ်များအပေါ်ပြင်းထန်စွာကန့်ကွက်ရှုတ်ချပြီး ဂျီနီဗာကွန်ဗန်းရှင်း(Geneva Conventions)နှင့် ကမ္ဘာ့ကုလသမဂ္ဂလုံခြုံရေးကောင်စီ၏ ဆုံးဖြတ်ချက်များအပါအဝင် ပြည်တွင်းပြည်ပဥပဒေများကို ပြက်ရယ်ပြု၊ ချိုးဖောက်နေသည့် စစ်ကောင်စီကို နိုင်ငံတကာအနေဖြင့် အချိန်မီထိရောက်စွာ တားဆီးအရေးယူကြရန် တောင်းဆိုထားသည်။
