ကလေးမြို့မှ စိတ်ဝေဒနာရှင်၊ဆွံအ၊နားမကြားဖြစ်နေသောအမျိုးသားတစ်ဦးကို အာဏာသိမ်းစစ်ကောင်စီတပ်ကသေနတ်ဖြင့် ပစ်သတ်လိုက်ကြောင်း ဒေသခံများပြောသည်။
ဆွံ့အနေသောကြောင့် ရွှေအ ဟုဒေသခံများကချစ်စနိုးခေါ်သည့် စိတ်ဝေဒနာရှင်အမျိုးသားကို ကလေးမြို့ လျှပ်စစ်ရုံးအနီးတွင် အကြမ်းဖက်စစ်ကောင်စီတပ်ဖွဲ့ဝင်များက ဇန်နဝါရီ ၁၅ရက်၌ သေနတ်ဖြင့်ပစ်ခတ်ခဲ့သဖြင့် သေဆုံးခဲ့ခြင်းဖြစ်သည်။
“စစ်တပ်က သံသယရှိတာနဲ့ ပစ်ခတ်နေတာ။ ရွှေအ ကစကားလည်းမပြောတတ်ဘူး။ နားလည်းမကြားဘူး။ စစ်တပ်က ပစ်ပြီး ဒဏ်ရာရတော့ ဆေးရုံမှာ ကုပေမယ့်လည်းမရတော့ဘူး။သေဆုံးသွားတယ်”ဟု ဒေသခံတစ်ဦးက ပြောသည်။
ရွေအ,သည် စိတ်ရောဂါဝေဒနာခံစားနေရသူတစ်ဦးဖြစ်ပြီး စကားပြောတတ်ခြင်းမရှိသည့်အပြင် အကြားအာရုံအနည်းငယ်ချို့ယွင်းနေသူဖြစ်ကြောင်းစစ်ကိုင်းတိုင်းဒေသကြီး လွှတ်တော်ကိုယ်စားလှယ် ဒေါ်သန့်ဝေကျော်က လူမှုကွန်ရက်စာမျက်နှာတွင်ဇန်နဝါရီ ၁၆ တွင်ရေးသားထားသည်။
Public Service Announcement
အကြမ်းဖက်စစ်ကောင်စီတပ်များသည် ကလေးမြို့နယ်အတွင်းဒေသခံပြည်သူများကို ရန်သူကဲ့သို့ဆက်ဆံနေပြီး လုံခြုံရေးအကြောင်းပြချက်ဖြင့် သေနတ်မကြာခဏပစ်ခတ်နေသည်ဟု ဒေသခံများကပြောသည်။ မကြာသေးမီကလည်း စစ်ကိုင်းတိုင်းဒေသကြီး ဒီပဲယင်းမြို့နယ်မှ စိတ်ကျန်းမာရေးချို့တဲ့နေသူတစ်ဦးကို စစ်ကောင်စီတပ်က မီးရှို့သတ်ဖြတ်ခဲ့သည်။
