ချင်းပြည်နယ် ဖလမ်းမြို့နယ် ဖလမ်း – ကလေး ကားလမ်းမပေါ်တွင် ချင်းအမျိုးသားကာကွယ်ရေးတပ် (CNDF)နှင့် အကြမ်းဖက်စစ်ကောင်စီတို့အကြား တိုက်ပွဲဆက်လက်ဖြစ်ပွားခဲ့ရာ စစ်ကောင်စီတပ်မှသေဆုံးထိခိုက်များခဲ့သည်ဟု ချင်းအမျိုးသားအဖွဲ့ချုပ်(CNO) က ယမန်နေ့ညတွင် ထုတ်ပြန်သည်။
ဇန်နဝါရီလ ၁၆ ရက်က ဖလမ်းမြို့နယ် ပါရ်သဲကျေးရွာ အနီးတွင် စစ်ကြောင်းထိုးလာသော အကြမ်းဖက်စစ်ကောင်စီတပ်ကို CNO လက်အောက်ခံတပ် CNDF က ခုခံတိုက်ခိုက်ခဲ့ရာစစ်ကောင်စီဘက်မှ ၁၇ ဦး သေဆုံးပြီး ဒဏ်ရာရရှိသူများလည်း ရှိကြောင်း ဖော်ပြသည်။ အဆိုပါတိုက်ပွဲတွင် CNDF ဘက်မှတစ်ဦး ဒဏ်ရာရရှိခဲ့သည်ဟု ဆိုသည်။
ယင်းတိုက်ပွဲတွင် ဖလမ်းမြို့ အခြေစိုက် ခလရ (၂၆၈) တပ်မှ လက်နက်ကြီးဖြင့် ပစ်ကူတိုက်ခိုက်ခဲ့ကြောင်း ထုတ်ပြန်သည်။
ဇန်နဝါရီလ ၁၇ ရက်တွင်လည်း လာသီးကျေးရွာအနီး၌ အကြမ်းဖက် စစ်ကောင်စီများအား CNDFတပ်ဖွဲ့မှ ဆက်လက်ခုခံတိုက်ခိုက်ခဲ့ရာ အကြမ်းဖက်စစ်ကောင်စီ ဘက်မှ ၈ ဦး သေဆုံးကာ ဒဏ်ရာရရှိသူများပြားခဲ့သည်ဟု ထုတ်ပြန်သည်။ CNDF ဘက်မှ ထိခိုက်ဒဏ်ရာ ရရှိသူမရှိဟု ဆိုသည်။
ဖလမ်း – ကလေး လမ်းအပါအဝင် ချင်းပြည်နယ်ဘက်သို့ ထိုးစစ်ဆင်ဝင်ရောက်လာသည့် စစ်ကောင်စီတပ်များကို ဒေသကာကွယ်ရေးတပ်များက ခြုံခိုတိုက်ခိုက် ခုခံလျက်ရှိသည်။