အရာ​တော်မြို့နယ်၊​ ငွေတွင်း​ကျေးရွာမှ ပျူ​နှင့်စစ်​ကောင်စီတပ်က ရွာသူ၊ ရွာသားများကိုဖမ်းဆီးနှိပ်စက်​နေ

စစ်ကိုင်းတိုင်း၊ အရာတော်မြို့နယ်၊ ငွေတွင်းကျေးရွာရှိ အကြမ်းဖက်စစ်ကောင်စီတပ်နှင့် ပျူစောထီးအဖွဲ့သည် ရွာသူရွာသားများအား ဖမ်းဆီးနှိပ်စက်မှူများ ပြုလုပ်နေကြောင်း ဒေသခံများက ​ပြောသည်။

ငွေတွင်းကျေးရွာရှိ စစ်ကောင်စီတပ်ဖွဲ့နှင့် ပျူစောထီးများသည် ၎င်းတို့မိသားစုဝင်မှလွဲ၍ အခြားကျေးရွာသူ ကျေးရွာသားများကို မထင်လျှင်မထင်သလို ဖမ်းယူစစ်ဆေးနှိပ်စက်လျက်ရှိကြောင်း၊ ငွေတွင်းကျေးရွာမှ အသက် ၄၀ နှစ်အရွယ် အမျိူးသားတစ်ဦးသည် ကျေးရွာရှိ စစ်ကောင်စီတပ်နှင့် ပျူစောထီးငရဲခန်းတွင် ဖမ်းဆီးနှိပ်စက်ခံရပြီး ၎င်းတို့လက်မှထွက်ပြေးလွတ်မြောက်လာခဲ့ကြောင်း၊ ၎င်းအား သံပင်လုံးဖြင့် ခြေသလုံးကိုလှိမ့်ခြင်း၊ ရေကန်တွင် ရေမွန်းအောင် ရေနှစ် သတ်ခြင်း၊ ခြေထောက်ဖြင့် ကန်ခြင်း၊ လက်သီးဖြင့် ထိုးနှက်ခြင်းများ ပြုလုပ်နှိပ်စက်ခဲ့ကြသည်ဟု ထွက်ဆိုကြောင်း၊ အလေးသွားဟန်ပြ၍ချောင်ကြိုချောင်ကြားမှ ထွက်ပြေးလွတ်မြောက်လာခဲ့ကြောင်း ၅ မြို့နယ်မဟာမိတ်တပ်ပေါင်းစုက သတင်းထုတ်ပြန်သည်။

စစ်ကောင်စီတပ်နှင့် ပျူစောထီးအဖွဲ့ဝင်များသည် အပြစ်မဲ့ပြည်သူများကို အကြောင်းမဲ့ဖမ်းဆီးပြီး နည်းမျိုးစုံဖြင့် နှိပ်စက်မှုများ ပြုလုပ်လာသည့်အတွက် မိမိတို့ဘဝလုံခြုံမှုမရှိတော့ဘဲ နှိပ်စက်အနိုင်ကျင့်မှုမှ လွတ်မြောက်ရန် ပြည်သူ့ကာကွယ်ရေးတပ်ဖွဲ့များနှင့်ပူးပေါင်းပြီး ရပ်ရွာရှိစစ်ကောင်စီတပ်နှင့်ပျူစောထီးများကို အမြန်ဆုံးတွန်းလှန်ကြရန် ၅ မြို့နယ်မဟာမိတ်တပ်ပေါင်းစုက တိုက်တွန်းသည်။

အရာတော်မြို့နယ်၊ ငွေတွင်းကျေးရွာသည် ပျူစောထီးအဖွဲ့ဝင်အားကောင်းသော ရွာကြီးတစ်ရွာဖြစ်ပြီး စစ်ကောင်စီတပ်များနှင့်ပူးပေါင်းကာ ရွာသူရွာသားများ၏ ဒေသထွက်ကုန်များအား တစ်ဝက်သိမ်းယူနေသည်ဟု မဟာမိတ်တပ်ပေါင်းစုက အသိပေးထားသည်။

Public Service Announcement

စစ်ကိုင်းတိုင်း၊အရာတော်မြို့နယ် ငွေတွင်းကျေးရွာအပါအဝင် ကျေးရွာငါးရွာက ပျူစောထီးအဖွဲ့ဝင်များအား အခြားကျေးရွာ၊ မြို့နယ်များသို့ ကျူးကျော်ဝင်ရောက်လာပါက ပြင်းထန်စွာအရေးယူမည်ဖြစ်ကြောင်း မဟာမိတ်တပ်ပေါင်းစုက သတိပေးထားပြီးဇန်နဝါရီလ ၃ ရက်နေ့က အရာတော်မြို့နယ် မင်းရွာနယ်မြေသို့ဝင်ရောက်လာသည့် အင်အား ၁၅ဦးပါ ပျူစောထီးအဖွဲ့ကို ငါးမြို့နယ်မဟာမိတ်တပ်ဖွဲ့က မိုင်းဆွဲတိုက်ခိုက်ခဲ့ရာ ပျူစောထီးအဖွဲ့ဝင် ၃ ဦးခန့်သေဆုံးခဲ့သည်။