မန္တလေးမြို့မှာ မူလတန်းကနေ အထက်တန်းအထိ သင်ကြားနေတဲ့ ကျုရှင်နဲ့စာသင်ဝိုင်းတွေကို စစ်ကောင်စီက ဒီရက်ပိုင်းမှာလိုက်လံဖမ်းဆီးတာတွေ လုပ်နေတယ်လို့ ပညာရေးအသိုင်းအဝိုင်းကနေစုံစမ်းသိရပါတယ်။
ဖွင့်လှစ်ထားတဲ့ အခြေခံပညာ ကျောင်းတွေမှာ တက်ရောက်တာမရှိဘဲ ရပ်ကွက်တွေမှာ ဖွင့်တဲ့ ပုဂ္ဂလိကကျုရှင် ၊စာသင်ဝိုင်းတွေကိုသာတက်ရောက်နေကြတဲ့အတွက် ဦးဆောင်သူတွေကိုလိုက်လံဖမ်းဆီးတာလို့ ဆိုကြပါတယ်။
“ကျောင်းတွေမှာတက်ရမယ့်အတန်းတွေသင်နေတဲ့ကျူရှင်တွေကိုလိုက်ဖမ်းနေတာ”လို့ စာသင်ဝိုင်းတစ်ခုမှာတက်ရောက်နေတဲ့ကျောင်းသားတစ်ဦးရဲ့မိခင်ကပြောပါတယ်။
ဒီလို စစ်ကောင်စီက လိုက်လံဖမ်းဆီးတာကြောင့် မန္တလေးမှာ ကျုရှင်နဲ့စာသင်ဝိုင်းအချို့ ပိတ်ထားရတယ်လို့သိရပါတယ်။
စစ်တပ်က အာဏာသိမ်းပြီးနောက် နိုင်ငံအတွင်း အာဏာဖီဆန့်မှုမရှိဘဲ ပုံမှန်လှည်ပတ်နေတယ်ဆိုတာကိုပြသချင်တဲ့အတွက် ကျောင်းတွေကို ဖွင့်လှစ်ခဲ့ပါတယ်။ဒါပေမယ့် လူထု က ဆန့်ကျင်တဲ့အနေနဲ့ သား၊သမီးတွေကို ကျောင်းပို့တာမျိုးမလုပ်ခဲ့ပါဘူး။
ငွေရေးကြေးရေး တတ်နိုင်တဲ့သူ ပုဂ္ဂလိက ကျောင်းတွေမှာ ထား ပေမယ့် စစ်ကောင်စီဖွင့်တဲ့ကျောင်းတွေမှာ မထားချင်တဲ့ အခြေခံလူတန်းစားတွေကတော့ ရပ်ကွက်ထဲက စာသင်ပေးတဲ့ သူတွေထံ သားသမီးတွေကို ပို့ကာ စာသင်စေတာပဲဖြစ်ပါတယ်။