ကရင်နီ(ကယား)ပြည်နယ် လွိုင်ကော်မြို့တွင် ယနေ့မွန်းလွဲပိုင်းတွင် တိုက်ပွဲဆက်လက်ဖြစ်ပွားနေကြောင်း လွိုင်ကော်မြို့ခံက ပြောသည်။
“မနေ့ကညက မြို့ပတ်ပတ်လည်မှာ တိုက်ပွဲဖြစ်တယ်။ ၅၄ တပ်နားရယ် နောက်ဒီဘက်က ဒကစရယ်၊ ပြီးတော့ ဒေါဥခူဘက်ကတော့ ပိုဆိုးတာပေါ့။ ည ၁နာရီခွဲကျော်ကျော်လောက်အထိ တိုက်ပွဲမရပ်ဘူး။ အဲဒါကြောင့် ကျင်း (ဗုံးခိုကျင်း)ထဲမှာ သွားပုံးနေရတယ်။ ဒီနေ့ ညနေခင်းလည်း စစ်ကောင်စီက ဒေါဥခူဘက်ကို အင်အားတစ်ရာ လောက်နဲ့ စစ်ကြောင်းထိုးနေတယ်တဲ့ အဲဒီဘက်မှာလည်း တိုက်ပွဲဖြစ်နေတယ် ဒီကနေ အသံကြားနေရတာပေါ့” ဟု ၎င်းက ပြောသည်။
ယမန်နေ့ညပိုင်း တိုက်ပွဲသတင်းကို ကရင်နီဒီမိုကရက်တစ်တပ်ဦး(KDF)က ထုတ်ပြန်ခဲ့ရာ စစ်ကောင်စီတပ်မှ ၁၅ဦးခန့်သေဆုံးပြီး ဒဏ်ရာရသူများပြားကြောင်း ဖော်ပြသည်။
ယမန်နေ့ညသန်းခေါင်ကျော်(ယနေ့ ဇန်နဝါရီ ၁၉)နံနက် အစောပိုင်းတွင် လွိုင်ကော် ဒေါဥခူ ရပ်ကွက်ရိ ခရိုင်အထွေထွေအုပ်ချုပ်ရေးစုပေါင်းရုံးအား KDF၊ GZ-21(Loikaw)နှင့် ပြည်သူ့ကာကွယ်ရေးပူးပေါင်းအဖွဲ့(JPDF)တို့ သွားရောက်တိုက်ခိုက်ခဲ့ခြင်းဖြစ်သည်ဟု ဆိုသည်။
Public Service Announcement
တိုက်ပွဲပြင်းထန်ပြီး ၁နာရီကျော်ကြာမြင့်ခဲ့ကြောင်း၊ စစ်ကောင်စီတပ်မှ အထိနာ၍ လက်နက်ကြီး လက်နက်ငယ်များ ရမ်းသမ်း ပစ်ခတ်ခဲ့သော်လည်း ထိခိုက်မှုမရှိ ပြန်လည်ဆုတ်ခွာနိုင်ခဲ့ကြောင်း KDFက ထုတ်ပြန်သည်။
