စစ်ကိုင်းတိုင်း ရွှေဘိုမြို့နယ် အနောက်ဘက်ခြမ်းရှိကျေးရွာများသို့ စစ်ကြောင်းထိုးလားသည့် စစ်ကောင်စီတပ်ကို နှစ်ကြိမ်ဆက် မိုင်းဆွဲတိုက်ခိုက်ခဲ့ကြောင်း အဆိုပါ မြို့နယ်မှ မြို့ပြပြောက်ကျား တပ်ဖွဲ့တစ်ခုဖြစ်သည့် SNAKE EYES-PDF(SHWEBO)က ယနေ့(ဇန်နဝါရီ ၂၀)ထုတ်ပြန်သည်။
ယမန်နေ့(ဇန်နဝါရီ ၁၉)နံနက်အစောပိုင်း ၁ နာရီ ၄၅ခန့်က ပလိုင်းရွာမှထိုးစစ်ဆင်လာသော စစ်ကောင်စီတပ်၏ စစ်ကြောင်းအား သန်းတောရွာအနီးတွင် မိုင်းဆွဲတိုက်ခိုက်ခဲ့ရာ စစ်ကောင်စီဘက်မှ ၁၀ ဦးခန့်သေဆုံးကြောင်း ထုတ်ပြန်ချက်တွင် ဖော်ပြသည်။
တိုက်ခိုက်ခံရသည့် ၎င်းစစ်ကြောင်းသည် ယမန်နေ့ညနေပိုင်းတွင် ရေကြည်ဝရွာမှ ပလိုင်းရွာဘက်သို့ ပြန်ဆုတ်သွားရာ ပလိုင်းရွာအထွက် ရွှေဘို-ချီပါ-မဲတော-ပလိုင်လမ်း၌ ဒုတိယအကြိမ် မိုင်းဆွဲတိုက်ခိုက်ခဲ့ကြောင်း SNAKE EYES PDF(SHWEBO)မှ တာဝန်ရှိသူတစ်ဦးက ပြောသည်။
“ကားသုံးစီးမှာ တစ်စီးမီးလောင်သွားတယ်လို့သတင်းရတယ်ဗျ။ ထိခိုက်ကျဆုံးသတင်းကိုတော့ အတည်ပြုဆဲနေဖြစ်ပါတယ်”ဟု ၎င်းက ဆက်ပြောသည်။
Public Service Announcement
စစ်ကြောင်းထိုးလာသည့် စစ်ကောင်စီတပ်များသည် တည်ပင်ရွာမှ ကင်းတဲတချို့ကိုမီးရှို့ဖျက်ဆီးခြင်း၊ ရွှေဘို-မူဆိပ်ခွန်-မူးကမ်းကြီး လမ်းပေါ်၌ လမ်းသွားလမ်းလာများအားစစ်ဆေးခြင်းများ ပြုလုပ်ခဲ့ကြောင်း သိရသည်။
အင်အား ၁၀၀ နီးပါးပါဝင်သော စစ်ကောင်စီတပ်များ သည် ရွှေဘိုမြို့နယ်အနောက်ဘက်ခြမ်းရှိ ထူးကြီး၊ တည်ပင်၊ ရေကြည်ဝ၊ သန်းတောရွာစသည့်ကျေးရွာများသို့ စစ်ကြောင်းထိုးလျက်ရှိရာ ဒေသခံပြည်သူ ၄၀၀၀ ခန့် ဘေးလွတ်ရာ ရှောင်တိမ်းနေကြရကြောင်း ဒေသကာ ကွယ်ရေးတပ်များက အတည်ပြုထားသည်။
အထက်ပါတိုက်ခိုက်မှုများကို SNAKE EYES- PDF (SHWEBO)၊ C&T(SHWEBO)နှင့် မြို့နယ် ပ.က.ဖ အဖွဲ့များ ပူးပေါင်းတိုက်ခိုက်ခဲ့ခြင်း ဖြစ်သည်။
