တောင်ဒဂုံမြို့နယ်တွင် ယမန်နေ့ညပိုင်းက ပေါက်ကွဲမှုနှစ်ကြိမ်ဖြစ်ပွားခဲ့ပြီး ယင်းပေါက်ကွဲမှုများမှာ စစ်ကောင်စီတပ်၏ ကင်းပုန်းများကို တိုက်ခိုက်ခဲ့ခြင်းဖြစ်ကြောင်း Freedom From Fear Youths(F2Y)မြို့ပြပြောက်ကျားတပ်ဖွဲ့က ထုတ်ပြန်သည်။
ဒဂုံမြို့သစ်တောင်ပိုင်းမြို့နယ် (၇၁)ရပ်ကွက်နဝဒေးလမ်းရှိ အမှတ်(၃)အခြေခံပညာလယ်တန်းကျောင်းတွင် နေ့စဉ် ည ၇ နာရီခန့်မှစပြီး ကင်းပုန်းဝပ်တပ်စွဲလေ့ရှိသည့် စစ်ကောင်စီတပ်အား နှစ်ကြိမ်ဆက်ဖောက်ခွဲတိုက်ခိုက်ခဲ့ခြင်းဖြစ်ကြောင်း ထုတ်ပြန်ချက်တွင် ဖော်ပြသည်။
စစ်ကောင်စီတပ်သားများ ကင်းပုန်းဝပ်သည့် စာသင် ကျောင်းအနီး ပထမအကြိမ်ဖောက်ခွဲတိုက်ခိုက်ခြင်းကို ယမန်နေ့ည ၈ နာရီခွဲတွင်ပြုလုပ်ခဲ့ပြီး ထိုပေါက်ကွဲမှုကြောင့် စစ်သားနှင့်အရပ်ဝတ် ၁၅ ဦးခန့်ပါဝင်သည့် စစ်ကောင်စီလက်ပါးစေများ ထပ်မံရောက်ရှိလာကြောင်း ထုတ်ပြန်ချက်က ဆိုသည်။
ထပ်ရောက်လာသည့် စစ်ကောင်စီလက်ပါးစေများကို ည ၈ နာရီ ၅၀မိနစ်တွင် ဒုတိယအကြိမ်ဖောက်ခွဲတိုက်ခိုက်ခဲ့ပြီး ထိခိုက်၊ သေဆုံးမှုအခြေအနေအား မသိရသေးကြောင်း F2Y အဖွဲ့က ပြောသည်။
Public Service Announcement
“စစ်ခွေကားရဲခွေးကားများ၊ အရေးပေါ်လူနာ တင်ယာဉ်များ ရောက်ရှိလာကြောင်းကို စုံစမ်းရသောပတ်ဝန်းကျင်ရှိ သတင်းအရင်းမြစ်များမှတဆင့် သိရှိရပါသည်။ ထိခိုက်သေဆုံးမှုကိုတော့ ထပ်မံစုံစမ်းဆဲဖြစ်ပါသည်”ဟု F2Y အဖွဲ့က ဆိုသည်။
အထက်ပါတိုက်ခိုက်မှုများပြုလုပ်ခဲ့သောFreedom From Fear Youths-F2Y(ကြောက်ရွံ့ခြင်းကင်းသော လူငယ်များအဖွဲ့)သည် ရန်ကုန်စစ်ဒေသခွဲကွပ်ကဲရေးအဖွဲ့နှင့် လက်တွဲဆောင် ရွက်နေသည့် ပြောက်ကျားတပ်ဖွဲ့အစည်းတစ်ခု ဖြစ်သည်။
