စစ်ကိုင်းတိုင်း အရာတော်မြို့နယ်၌ အကြမ်းဖက်စစ်ကောင်စီတပ်၏ ကားနှစ်စီးကို နှစ်ကြိမ်တိုင်မိုင်းဆွဲ တိုက်ခိုက်ခဲ့ကြောင်း အရာတော်မြို့နယ်သတင်းမှန်ပြန်ကြားရေးက ယနေ့(ဇန်နဝါရီ ၂၃ ရက်)တွင် ထုတ်ပြန်သည်။
ယနေ့(ဇန်နဝါရီ၂၃) နံနက်၆နာရီခွဲခန့်က အရာတော်အနောက်နယ်၊ယ အောင်သာကုန်းကျေးရွာမှ စစ်ကောင်စီတပ်ဖွဲ့များ ကားနှစ်စီးဖြင့် အရှေ့ဘက်သို့ တက်လာစဉ် ကျောက်စရစ်ကန်ကျေးရွာအထွက်တွင် ပထမအကြိမ် မိုင်းဆွဲတိုက်ခိုက်ခဲ့ကြောင်းထုတ်ပြန်ချက်က ဆိုသည်။
ထို့နောက် ဝါးရောင်းကျေးရွာအနီးတွင် နောက်တစ်ကြိမ် ထပ်မံမိုင်းဆွဲတိုက်ခိုက်ခံရကြောင်း ဒေသခံတစ်ဦးက ပြောကြားသည်။
“စစ်ခွေးတွေ သေတယ်လို့ ကြားတယ်။အဲဒါကြောင့် ရွာကို ပတ်မဲပြီး ဆဲဆိုနေတယ်”ဟု အရာတော် ဒေသခံတစ်ဦးက ပြောသည်။
Public Service Announcement
မိုင်းဆွဲတိုက်ခိုက်ခံရသောကြောင့် အကြမ်းဖက်စစ်ကောင်စီတပ်သားများ ရမ်းသမ်းပစ်ခတ်ပြီး ဝါးရောင်းကျေးရွာအနောက်ဘက် သရက်ပင်ရိုးတောခြေကို မွှေနှောက်ခဲ့သည်ဟု သိရသည်။
ထို့ကြောင့် အနီးအနားရှိရွာများမှ ဒေသခံများလည်း ပြေးလွှားရှောင်တိမ်းနေရကြောင်း သတင်းမှန်ပြန်ကြားရေးက အသိပေးသည်။
ဇန်နဝါရီ ဒုတိယပတ်ကစ၍ အကြမ်းဖက်စစ်ကောင်စီတပ်သား ၁၀၀ ခန့်သည် အရာတော်မြို့နယ်ရှိကျေးရွာများကို စစ်ကြောင်းထိုးခဲ့ပြီး ဇန်နဝါရီ ၁၃ ရက်တွင် မြို့နယ်တော်လှန်ရေး အင်အားစုများက မိုင်းဆွဲတိုက်ခိုက်မှု စတင်ခဲ့သည်။
ထိုဖြစ်စဥ်တွင် အကြမ်းဖက်စစ်ကောင်စီတပ်သား ၁၀ ဦးခန့်သေဆုံးနိုင်ကြောင်း အရာတော်မြို့နယ်တော်လှန်ရေးအင်အားစု ARA က ထုတ်ပြန်ထားသည်။
