ပုလဲနယ်တွင် ပျူစောထီးသင်တန်းပေးနေသော ကျေးရွာအား ပြည်သူ့ကာကွယ်ရေးတပ်များ စီးနင်းတိုက်ခိုက်၊ စစ်ကောင်စီတပ်သားနှစ်ဦးနှင့် ပျူစောထီးသုံးဦးသေ

စစ်ကိုင်းတိုင်း ပုလဲမြို့နယ်တွင် ပျူစောထီးသင်တန်းပေးနေသော ကျေးရွာအား ပြည်သူ့ကာကွယ်ရေး ပူးပေါင်းတပ်များက ဝင်ရောက်စီးနင်းတိုက်ခိုက်ရာ အကြမ်းဖက်စစ်ကောင်စီတပ်သားနှစ်ဦးနှင့် ပျူစောထီးသုံးဦး သေဆုံးကြောင်း အောင်ဆန်းတပ်ဖွဲ့က ယနေ့(ဇန်နဝါရီ ၂၃ ရက်)တွင် ထုတ်ပြန်သည်။

ပျူစောထီးများအား စစ်သင်တန်းပေးနေသော ပုလဲမြို့နယ် ဇီးဖြူကုန်းရွာအား ယနေ့ နံနက် ၂နာရီတွင် အောင်ဆန်းတပ်ဖွဲ့နှင့် ပုလဲမြို့နယ်ပြည်သူ့ကာကွယ်ရေးတပ်ဖွဲ့၏ မဟာမိတ်တပ်ပေါင်းစုမှ ဝင်ရောက် ပစ်ခတ်မှုပြုလုပ်ခဲ့သည်။

တိုက်ပွဲမှာ ၁၅မိနစ်ခန့်ကြာမြင့်ခဲ့ပြီး မဟာမိတ်တပ်ပေါင်းစုမှာ အောင်မြင်စွာ ပြန်လည်ဆုတ်ခွာနိုင်ခဲ့သည်ဟု အောင်ဆန်းတပ်ဖွဲ့က ဆိုသည်။

တိုက်ပွဲအတွင်း အကြမ်းဖက်စစ်ကောင်စီတပ်သား နှစ်ဦးနှင့် ပျူစောထီးသုံးဦး သေဆုံးကာ သုံးဦးထိခိုက် ဒဏ်ရာရကြောင် မြေပြင်ကနဦးသတင်းကို အောင်ဆန်းတပ်ဖွဲ့က အသိပေးသည်။

Public Service Announcement

မဟာမိတ်တပ်ပေါင်းစုမှ တစ်ဦးဒဏ်ရာရပြီး မစိုးရိမ်ရကြောင်းလည်း ထုတ်ပြန်ချက်၌ ဖော်ပြသည်။

ပုလဲမြို့နယ်တွင်း ကျေးရွာများမှ ပျူစောထီးသင်တန်းတက်ရောက်သူများ နှင့် ၎င်းတို့ မိသားစု၏ အသက် အိုးအိမ်ကို သက်ညှာမည်မဟုတ်ကြောင်း Pale Joker PDF အဖွဲ့ခေါင်းဆောင် ဗိုလ်ပုလဲအပါအဝင် ပြည်သူ့တပ်ဖွဲ့ များက မကြာသေးမီရက်ပိုင်းတွင် သတိပေးထားသည်။