တပ်မတော်သားများအနေဖြင့် အချိန်မနှောင်းမီ ပြည်သူ့ရင်ခွင်သို့ ခိုလှုံကာ ပြည်သူလူထုအပေါ် မတရား ညှင်းပန် နှိပ်စက်ပြီး မျက်ရည်ပေါက်ကြီးငယ်ကျစေသော အာဏာရှင် တစ်စု၏ ကြိုးကိုင်မှုအောက်မှ ရုန်းထွက်လာကြရန် ဖိတ်ခေါ်ကြောင်း ကရင်နီအမျိုးသားကာကွယ်ရေးတပ်(KNDF) တပ်ရင်း(၃)က ယနေ့ထုတ်ပြန်သည်။
တပ်မတော်သားများ၏ အခက်အခဲကို ကောင်စွာ သဘောပေါက်နားလည်ကြောင်း၊ KNDF တပ်ရင်း (၃)ထံ ဝင်ရောက်ခိုလှုံမည့် တပ်မတော်သားများကို နွေးထွေးစွာကြိုဆိုရန် အသင့်ရှိနေကြောင်း ဖော်ပြထားသည်။
ရဲရင့်ပြတ်သားသော စိတ်နှင့် သတ္တိများကို အသိအမှတ်ပြုသောအားဖြင့် လာရောက်ခိုလှုံမည့် တပ်မတော်သားများကို တစ်ဦးလျင် ကျပ် သိန်း ၂၀ နှင့်တစ်လလျင်ကျပ် ငါသောင်း ထောက်ပံ့ပေးမည်ဖြစ်ကြောင်းအသိပေးထားသည်။
စားဝတ်နေရေးအတွက် တာဝန်ယူမည့်အပြင် မိသားစုများနှင့် အဆက်အသွယ်ရနိုင်ရန်လည်းစီစဉ်ပေးမည်ဖြစ်
ကြောင်း၊လူထုတော်လှန်ရေးအောင်မြင်သည့် အချိန်ရောက်ပါက တပ်မတော်သားများကို လွတ်လပ်စွာ နေထိုင်ခွင့်ပေးမည်ဖြစ်ကြောင်းKNDFတပ်ရင်း (၃)က ထုတ်ပြန်သည်။
အောင်ပွဲခရီးမဝေးတော့၍ အတူတကွ ပူးပေါင်းကာ ပြည်သူလူထုကို ကာကွယ်ပေးကြရန် မေတ္တာရပ်ခံသည်ဟုလည်းပါရှိသည်။
ပြည်သူလူထု ကိုယ်တိုင် အဆုံးအဖြတ်ပေးမည့် အချိန်ရောက်သည့်အခါတွင် မုန့်ယူမလား တုတ်ယူမလားဆိုသည်မှာ တပ်မတော်သားတစ်ဦးစီ၏ ကိုယ်ပိုင် ရွေးချယ်မှုပေါ်တွင်သာမူတည်ကြောင်း အသိပေးအပ်သည်ဟု ထုတ်ပြန်ထားသည်။
KNDF၏ ထုတ်ပြန်ချက်ကို CDM စစ်သားနှင့်ရဲ တို့၏ အရေးကိစ္စများ ကိုင်တွယ်ဆောင်ရွက်နေသည့် ပြည်သူ့ပန်းတိုင် အဖွဲ့က ထပ်မံဖော်ပြကာ KNDF တပ်ရင်း(၃)ထံ ဝင်ရောက်ခိုလှုံလိုသော တပ်မတော်သားများ အနေဖြင့် ထုတ်ပြန်ချက်ကို သေချာဖတ်ရှုပြီး ပြည်သူ့တပ်သားအဖြစ် ခံယူလိုပါက ၀၉၄၅၅၅၆၅၇၆၉၊ ၀၉၉၈၁၈၈၀၉၂၆ နှင့် ၀၉၆၈၄၅၄၇၈၉၅ သို့ ဆက်သွယ်ကြရန် ထုတ်ပြန်ထားသည်။