ယမန်နေ့ကလည်း ဒီးမော့ဆိုတွင် တစ်နေကုန် တိုက်ပွဲဖြစ်
ကရင်နီ(ကယား)ပြည်နယ် ဒီးမော့ဆိုမြို့သို့ အကြမ်းဖက်စစ်ကောင်စီတပ်က အင်အား ၇၀၀ခန့်ပါ စစ်ကြောင်းနှစ်ခုဖြင့် စစ်ကြောင်းထိုးရန်ပြင်ဆင်နေသည်ဟု ဒီးမော့ဆို မြို့နယ် ပြည်သူ့ကာကွယ်ရေးတပ်ဖွဲ့၏ တာဝန်ရှိသူတစ်ဦးက လူထုနွေဦးသို့ပြောသည်။
ကရင်နီပြည်နယ်၏ နယ်မြေဗျူဟာအရ ဒီးမောဆို မြို့နယ်မှာ အရေးကြီးသည့်အတွက် ထိန်းချုပ်ရန် ပြင်ဆင်ခြင်းသို့မဟုတ် ကရင်နီပြည်နယ်ရှိ အခြား မြို့နယ်များသို့ လျင်မြန်စွာစစ်ကူပေးရန်အကြမ်း ဖက်စစ်ကောင်စီဘက်မှ ကြိုးစားနေသည်ဟု ၎င်းက သုံးသပ်သည်။
“နေ့စဥ်နဲ့ အမျှတိုက်ပွဲ အကြီး၊အသေးတွေက ရှိနေတယ်။မနေ့ကဆို အကြမ်းဖက်စစ်တပ်ရဲ့စစ်ကြောင်း တက်လာတာကို သတင်းရလို့ စောင့်ကြည့်ထားတယ်။ကျွန်တော်တို့ဘက်လည်း အဆင်သင့် လုပ်ထားတယ်”ဟု အထက်ပါတာဝန်ရှိသူက ပြောသည်။
Public Service Announcement
ဆက်လက်၍ ၎င်းက”ဘောလခဲနဲ့ တခြားနယ်မြို့တွေမှာ စစ်တပ်ရဲ့ ရှေ့စခန်းတွေ ရိက္ခာမရှိကြတော့ဘူးဆိုတာ ကျွန်တော်တို့သိထားရတယ်”ဟု ရှင်းပြသည်။
ယမန်နေ့ကလည်း ဒီးမော့ဆိုမြို့နယ် စံပြ(၆) မိုင်ကျေးရွာအုပ်စု ဟိုဖိတ်ကျေးရွာနှင့် စိုက်ကွင် (၂) ကျေးရွာတို့တွင် အကြမ်းဖက်စစ်ကောင်စီတပ်ဖွဲ့မှ စစ်ကြောင်းထိုးလာသဖြင့် နှစ်ဖက်ထိတွေ့တိုက်ပွဲမှာ နံနက် ၈နာရီမှ ည ၆နာရီအထိ ဖြစ်ပွားခဲ့သည်။
တိုက်ပွဲအတွင်း အကြမ်းဖက်စစ်ကောင်စီတပ်ဘက်မှ ထိခိုက်ကျဆုံးမှုများပြားခဲ့ပြီး ကရင်နီ တပ်မတော်ဘက်မှ ရဲဘော်တစ်ဦးမစိုးရိမ်ရသော ဒဏ်ရာရခဲ့ကြောင်း ကရင်နီတပ်မတော် KNDF က ထုတ်ပြန်ထားသည်။
