ပြည်သူများထံမှ ပစ္စည်းများလုယက်သယ်ဆောင်လာသည့် အကြမ်းဖက်စစ်ကောင်စီတပ်သားများနှင့် ပျူစောထီးများပါရှိသည့် ကားနှစ်စီးကို ပြည်သူ့ကာကွယ်ရေးတပ်ဖွဲ့ ညီနောင်မဟာမိတ်ရှစ်ဖွဲ့ ပူးပေါင်း၍ မိုင်းဆွဲတိုက်ခိုက်မှုကြောင့် ပျူစောထီးတစ်ဦးသေဆုံးခဲ့ကြောင်း သပြေညိုပြောက်ကျားတပ်ဖွဲ့က လူထုနွေဦးသို့ ပြောသည်။
ဖြစ်စဥ်မှာ ဇန်နဝါရီ၂၃ ရက် နံနက်၆ နာရီခွဲခန့်က အကြမ်းဖက်စစ်ကောင်စီတပ်နှင့် ပျူစောထီး ပူးပေါင်းအဖွဲ့သည် စစ်ကိုင်းတိုင်း အရာတော်မြို့နယ် အောင်သာကုန်းကျေးရွာမှ ကားနှစ်စီးဖြင့် ထွက်လာစဥ် စတင်တိုက်ခိုက်ခံခဲ့ရသည်။
“သေသွားတဲ့ ပျူစောထီးကို ကျွန်တော်တို့ မသတ်ဘူးလို့ အတန်တန်ပြောတဲ့ကြားထဲက ထွက်ပြေးတာ။အဲဒါကြောင့် ပစ်လိုက်ရတာ။စစ်ခွေးတွေလည်း သေတယ်ဆိုတာတော့ အတည်ပြုတယ်။ဘယ်နှစ်ယောက်မှန်း မသိသေးလို့ပါ”ဟု သပြေညိုပြောက် ကျားတပ်ဖွဲ့ တာဝန်ရှိသူတစ်ဦးက ရှင်းပြသည်။
အရာတော်နယ် ဝါရောင်းကျေးရွာအနောက်ဘက်၌ ပထမအကြိမ်တိုက်ခိုက်မှုတွင် ပဒေသာမိုင်းလေးလုံး အသုံးပြုခဲ့ပြီး ကားနှစ်စီးအနက်တစ်စီးမှာထိုးရပ်သွားခဲ့သည်။
Public Service Announcement
ထိုနေရာတွင် အကြမ်းဖက်စစ်ကောင်စီတပ်သားများသည် ပတ်ဝန်းကျင်အား ရမ်းသမ်းပစ်ခတ်မှုများပြုလုပ်ခဲ့သည်။
ထို့နောက် စစ်ကောင်စီလက်ပါးစေ ပျူစောထီးနှစ်ဦးက မိုင်းဆွဲခံရသည့်ကားကို ထပ်မံပါရှိသည့် ကားတစ်စီးဖြင့် ချိတ်ဆွဲ၍ ကျောက်စရစ်ရွာကန်ရွာဘက်သို့ ပြန်ထွက်ခွာစဥ် ပဒေသာမိုင်းနှစ်လုံး၊တူမီးရှေ့ထွက်လက်နက်ကြီးဖြင့် တိုက်ခိုက်ခဲ့ရာ ပျူစောထီးတစ်ဦး ဒဏ်ရာရရှိပြီး ဖမ်းမိသော်လည်း ထွက်ပြေးရန် ကြိုပမ်းသဖြင့် ပစ်သတ်ခဲ့ရကြောင်း သပြေညိုပြောက် ကျားတပ်ဖွဲ့ကထုတ်ပြန်ထား သည်။
ဇန်နဝါရီ ဒုတိယပတ်ကစ၍ အကြမ်းဖက်စစ်ကောင်စီတပ်သား ၁၀၀ခန့်မှာ အရာတော်မြို့နယ်ရှိကျေးရွာများကို စစ်ကြောင်းထိုးခဲ့ပြီး ဇန်နဝါရီ ၁၃ ရက်တွင် မြို့နယ်တော်လှန်ရေး အင်အားစုများက မိုင်းဆွဲတိုက်ခိုက်မှုစတင်ခဲ့သည်။
ထိုဖြစ်စဥ်တွင် အကြမ်းဖက်စစ်ကောင်စီတပ်သား ၁၀ ဦးခန့်သေဆုံးနိုင်ကြောင်း အရာတော်မြို့နယ်တော်လှန်ရေးအင်အားစု ARA က ထုတ်ပြန်ထားသည်။
