ချင်းပြည်နယ်၊ မတူပီမြို့နယ် မတူပီ-ပလက်ဝကားလမ်းပေါ်ရှိ အကြမ်းဖက်စစ်ကောင်စီတပ်၏ ထယ်ဘွေးတပ်စခန်းကို CDF(မတူပီ)ကသွားရောက်တိုက်ခိုက်စဥ် CDF(မတူပီ)ဘက်ရဲဘော် ၃ ဦးကျဆုံးသွားကြောင်း ဒေသခံများကပြောသည်။
ပြည်သူနှင့် နိုင်ငံတော်အတွက် အသက်ပေးလှူသွားသည့်ရဲဘော် သုံးဦးအနက် ဆလိုင်းဆိုင်းလျန်သည် အကြမ်းဖက်စစ်ကောင်စီတပ်များထောင်ထားသည့် မိုင်းများကို ရှင်းလင်းစဉ် ပေါက်ကွဲကျဆုံးခဲ့ခြင်းဖြစ်ပြီး ကျန်နှစ်ဦးဖြစ်သောဆလိုင်းတုန်မန်းနှင့် ဆလိုင်းလျန်အောင်တို့မှာ စစ်ကောင်စီတပ်နှင့် တိုက်ပွဲတွင် ကျဆုံးခဲ့ခြင်းဖြစ်သည်ဟု ဒေသခံများကပြောသည်။ စစ်ကောင်စီတပ်ဘက်မှ သေဆုံးထိ့ခိုက်မှု ရှိ၊မရှိကိုမူမသိ့ရသေးပေ။
မိုင်းထိမှန်ကျဆုံးခဲ့သည့် ဆလိုင်းဆိုင်းလျန်သည် CDF(မတူပီ) တပ်ရင်း ၃ မှဖြစ်ပြီး ကျန်နှစ်ဦးမှာ တပ်ရင်း ၁ မှဖြစ်ကြောင်း CDFနှင့် နီးစပ်သောဒေသခံတစ်ဦးကပြောသည်။
“မိုင်းထိတဲ့ တစ်ယောက်က အိမ်ထောင်သည်တစ်ယောက်ပါ။သူမှာကလေးလဲရှိတယ်”ဟု အထက်ပါဒေသခံကဆက်ပြောသည်။
တိုက်ပွဲတွင်ကျဆုံးခဲ့သော ဆလိုင်းတုန်မန်၏ မိတ်ဆွေတစ်ဦးကလည်း“ဆလိုင်းတုန်မန်က ရန်ကုန် ဖွံဖြိုးရေးဒီဂရီကောလိပ်က ကျောင်းသားတစ်ဦးပါ။ သူကျဆုံးတယ်ကြားရတယ်။ တော်တော်စိတ်မကောင်းဖြစ်ရတယ်။”ဟုပြောသည်။
မင်းတပ်-မတူပီလမ်း မိုင်၇၀ ဝန်းကျင်တွင် ယမန့်နေ့တည်းက တိုက်ပွဲဖြစ်ပွားနေခြင်းဖြစ်သည်ဟု ဒေသခံများကပြောသည်။
မတူပီ-ပလက်ဝလမ်းပေါ်ရှိ စစ်ကောင်စီ၏ ထယ်ဘွေးတပ်စခန်းကို CDF(မင်းတပ်) က ဇန်နဝါရီလအတွင်း သုံးကြိမ်မြောက်သွားရောက်တိုက်ခိုက်ခဲ့ခြင်းဖြစ်သည်။
ဇန်နဝါရီ ၃ ရက်နှင့် ၄ ရက်တွင် ပထမအကြိမ်သွားရောက်တိုက်ခိုက်ခဲ့ပြီး ဇန်နဝါရီ ၇ ရက်နှင့် ၈ ရက်တွင် ဒုတိယအကြိမ် တိုက်ခိုက်ခဲ့ခြင်းဖြစ်သည်။ ဇန်နဝါရီ ၇ ၊၈ တိုက်ပွဲတွင်စစ်ကောင်စီတပ်မှ ၂ ဦးသေဆုံးခဲ့ပြီး ဒေသခံကာကွယ်ရေးတပ်များမှ ထိ့ခိုက်ကျဆုံးသူမရှိခဲ့ပေ။