ကရင်နီ(ကယား)ပြည်နယ် ဖရူဆိုမြို့မရဲစခန်းနှင့် ခမရ (၄၂၈)တပ်ကို ဝင်ရောက်တိုက်ခိုက်ရာ စစ်ကောင်စီ တပ်သားများ ထိခိုက်သေဆုံးမှုရှိကြောင်း KNDF B-15 က ယနေ့(ဖေဖော်ဝါရီ ၁ ရက်)တွင် ထုတ်ပြန်သည်။
တိုက်ပွဲဖြစ်စဥ်မှာ ယမန်နေ့(ဇန်နဝါရီ ၃၁) ည ၈နာရီဝန်းကျင်က ကရင်နီတပ်မတော်(KA)နှင့် ကရင်နီအမျိုးသားများကာကွယ်ရေးတပ် (KNDF) ပူးပေါင်းတပ်ဖွဲ့များက ဝင်ရောက်တိုက်ခိုက်ခဲ့ခြင်းဖြစ်သည်။
“ကရင်နီပြည်နယ်ထဲက ရဲစခန်းတိုင်းမှာ စစ်တပ်က အထိုင်ယူထားတယ်။ အနည်းဆုံး ၂၀ဝန်းကျင်ရှိတယ်။ဒါကြောင့် မနေ့ညက ကျွန်တော်တို့ဝင်တိုက်တာ။သူတို့ ဘက်ကအသေတွေရှိတယ်။အတည်ပြုနေဆဲပဲ”ဟု KNDF တာဝန်ရှိသူတစ်ဦးက လူထုနွေဦးသို့ ပြောသည်။
နာရီဝက်ကျော်ကြာမြင့်သည့် အဆိုပါတိုက်ပွဲတွင် တစ်စုံတစ်ရာ ထိခိုက်မှုမရှိဘဲ ကောင်းမွန်စွာ ပြန်လည်ဆုတ်ခွာနိုင်ခဲ့သည်ဟု KNDFက ဆိုသည်။