●စစ်ကောင်စီစိုးမိုးသောတာချီလိတ်တွင် ဗုံးခွဲခြင်းမှာ စစ်တပ်ကပင်ဖြစ်နိုင်ကြောင်းမြို့ခံနှင့်လေ့လာသူများပြော
တာချီလိတ်မြို့ ရှမ်းရိုးမကွင်းအနီး ဗိုလ်ချုပ်လမ်းမပေါ်တွင် စစ်တပ်ထောက်ခံသူများ စုဝေးနေစဥ် ယနေ့( ဖေဖော်ဝါရီလ ၁ ရက်) နေ့လယ် ၁၂ နာရီခန့်ကဗုံးပေါက်ကွဲခဲ့သည်။ ဗုံးပေါက်ကွဲပြီးနောက် လူအချို့ဒဏ်ရာများဖြင့် လဲနေစဥ် လူအုပ်ထဲမှ အရပ်ဝတ်စစ်သားများက သေနတ်ဖြင့် ရမ်းသမ်းပစ်ခတ်၍ ထိခိုက်မှုများပြားခဲ့ခြင်းဖြစ်ကြောင်း ဒေသခံတစ်ဦးကပြောသည်။
” စစ်တပ်က ကောင်တွေက တပ်ထောက်ခံသူတွေကြားထဲမှာ အရပ်ဝတ်တွေနဲ့ လိုက်လာတာ။ ဗုံးပေါက်ပေါက်ချင်း သေနတ်တွေထုတ်ပြီး ပတ်ဝန်းကျင်ကို ရမ်းသမ်းပစ်တာ။ ဒီညနေအထိ သိရသေလောက် နှစ်ဦးသေတယ်။ လေးဆယ်လောက်ဒဏ်ရာရတယ်” ဟု ၎င်းကဆက်ပြောသည်။
ယနေ့ နိုင်ငံနှင့်အဝှမ်း အောင်မြင်နေသည့် အသံတိတ်သပိတ်ကို ပုံဖျက်ရန် ကြိုးစားသည့်အနေဖြင့် စစ်တပ်ထောက်ခံပွဲတွင် စစ်ကောင်စီက ဗုံးပြန်ခွဲခြင်းဖြစ်နိုင်သည်ဟု ဒေသခံအချို့ကမှတ်ချက်ပြုသည်။
Public Service Announcement
CDM ဗိုလ်ကြီးလင်းထက်အောင်ကလည်း”ကျွန်တော်သိရသလောက် အကြမ်းဖက်စစ်တပ်ထောက်ခံပွဲလုပ်တဲ့နေရာတွေမှာ တော်လှန်ရေးအင်အားစုတွေက လက်ရှောင်ထားတယ်။တာချီလိတ်ဘက်က လုပ်ရပ်က ဂေါင်းကြီးတို့အချင်းချင်းပြန်လုပ်တာလို့သိရတယ်။နောက်ပြီး တာချီလိတ် မှာ PDF တွေ မရှိလောက်ဘူး။တာချီလိတ်ဆိုတာ စကစ(စစ်ကောင်စီ)တွေစိုးမိုးတဲ့နေရာ။သေချာပါတယ် ။အချင်းချင်း ပြန်သမတာ သေချာလွန်းပါတယ်”ဟုဗုံးဖောက်ခွဲခြင်း မှာ စစ်ကောင်စီတပ်ကပင်ပြန်လုပ်ခြင်းဖြစ်ကြောင်း သူ့အမြင်ကိုရေးသားထားသည်။
စစ်တပ်ထောက်ခံပွဲသို့ ရောက်လာသူများမှာတောင်ပေါ်ဒေသရှိ အာခါ၊ လားဟူ တိုင်းရင်းသားများဖြစ်ပြီး အများစုသည် သက်ကြီးရွယ်အိုများဖြစ်သည်။ နေ့စားခပေး၍ တောင်ပေါ်မှ ခေါ်လာခြင်းခံရပြီး စစ်တပ်ထောက်ခံပွဲကို ဘုမသိဘမသိလိုက်ပါလာသူများဟု ဒေသခံများကပြောသည်။
