အကြမ်းဖက်စစ်တပ်နှင့်တွေ့ဆုံဆွေးနွေးကာ အာဏာခွဲဝေမှုအလားအလာကို အထူးကိုယ်စားလှယ်ထည့်သွင်းပြောကြားသဖြင့် ပြင်းထန်စွာဝေဖန်ခံရ
ကုလသမဂ္ဂအထွေထွေအတွင်းရေးမှူးချုပ်၏ မြန်မာနိုင်ငံဆိုင်ရာအထူးကိုယ်စားလှယ်အသစ် နိုလင်းဟေဇာသည် မြန်မာနိုင်ငံ၏ မြေပြင်အခြေအနေကို မသိရှိကြောင်းနှင့် မြန်မာပြည်သူများ၏ အသံကို နားထောင်ရန်လိုအပ်ကြောင်း မြန်မာ့အရေးလေ့လာသူအချို့က တိုက်တွန်းသည်။
ကုလအထူးကိုယ်စားလှယ် နိုလင်းဟေဇာသည် ဇန်နဝါရီ ၃၁ ရက်တွင် စင်ကာပူအခြေစိုက် CNA သတင်းဌာနနှင့် အင်တာဗျူးပြုလုပ်ရာတွင် မြန်မာ့အရေးတွင် စစ်တပ်၏ အခန်းကဏ္ဍကို ချန်ထားခဲ့၍မရဘဲ အားလုံးပါဝင်သော တွေ့ဆုံဆွေးနွေးရေးပြုလုပ်ရန်လိုအပ်ကြောင်း ထည့် သွင်းဖြေကြားသည်။
ထို့အပြင် မြန်မာစစ်တပ်သည် လက်ရှိတွင် နိုင်ငံကို ထိန်းချုပ်ထားနိုင်ပြီဟုလည်း အထူးကိုယ်စား လှယ်နိုလင်းဟေဇာက CNA ကို မှတ်ချက်ပြုသည်။
“လူငယ်အများအပြား အထူးသဖြင့် လူငယ်တွေဟာ အလုံးစုံနိုင်ငံရေးပြောင်းလဲမှုတစ်ခုအတွက် တိုက်ခိုက်ရင်း သေဆုံးချင်နေကြတာ ကျွန်မသိတယ်။ ဘယ်နိုင်ငံရေးပြောင်းလဲမှုမဆို ဖြစ်စဉ်နဲ့ သွားရပြီး နေ့ချင်းညချင်းဖြစ်လာတာမဟုတ်ပါဘူး။ ဒါကြောင့် လူငယ်တွေကို ဆက်လက်ရှင် သန်စေချင်တယ်။ မသေစေချင်ဘူး။ နောက်ပြီး ရေရှည်ကာလမှာ ဖြစ်ကောင်းဖြစ်လာနိုင်တဲ့ အာဏာခွဲဝေမှုအတွက် သူတို့(လူငယ်တွေ) ညှိနှိုင်းဆွေးနွေးဖို့လိုတယ်။ သူတို့ဟာ စားပွဲဝိုင်းမှာ ရှိ ရမှာပါ” ဟု နိုလင်းဟေဇာက CNA ကို ပြောသည်။
ကုလအထူးကိုယ်စားလှယ် နိုလင်းဟေဇာ၏ အထက်ပါပြောကြားမှုများသည် မှားယွင်းကြောင်း ဖေဖော်ဝါရီ ၁ ရက်တွင်ပြုလုပ်ခဲ့သော အသံတိတ်သပိတ်က ရှင်းလင်းစွာ
သက်သေပြနေကြောင်း မြန်မာ့အရေးလေ့လာသူ အီဂေါဘလာဇီဗစ်က ပြောသည်။
“သံအမတ်ကြီး နိုလင်းဟေဇာခင်ဗျား ပြည်သူတွေရဲ့ အသံကို နားထောင်လိုက်စမ်းပါ။ စစ်တပ်ဟာ မြန်မာပြည်ကိုထိန်းချုပ်မထားနိုင်ဘူး။ စစ်တပ်ဟာ ပြည်သူကို သတ်နေတယ်။ ထောင်သောင်းချီ ဖမ်းဆီးနေတယ်။ အချုပ်ခန်းတွေထဲမှာ ပြည်သူကို ညှင်းပန်းနှိပ်စက်နေတယ်။ မြို့တွေရွာတွေကို မီးတင်ရှို့တယ်။ ပြည်သူ့ကို အိုးအိမ်နေရပ်တွေကနေ စွန့်ခွါအောင်လုပ်နေပြီး ပြည်သူ့ဥစ္စာပစ္စည်းတွေကို ဖျက်စီးပစ်နေတယ်။ စစ်တပ်ဟာ ရာဇဝတ်မှုကျူးလွန်နေတယ်။ စစ်တပ်ဟာ လူသားမျိုးနွယ်အပေါ် ဆန့်ကျင်နှိပ်ကွပ်တဲ့ ပြစ်မှုကြီးကျူးလွန်နေတယ်။ စစ်တပ်ဟာ စစ်ရာဇဝတ်မှုကျူးလွန်နေတယ်။ စစ်တပ်ဟာ လူမျိုးစု သုတ်သင်ရှင်းလင်းမှု လုပ်နေတယ်။ သူတို့ဟာ ဒီပြစ်မှုတွေကိုနေ့စဉ်နဲ့ အမျှကျူးလွန်နေတယ်။ ဒီလိုဆိုးဝါးရက်စက်မှုတွေ နေ့စဉ်ရက်ဆက် လုပ်နေတာက စစ်တပ်ဟာ နိုင်ငံကို မထိန်းချုပ်နိုင်လို့ ဆိုတာ သေချာရှင်းလင်းနေတာပဲ” ဟု အီဂေါက သူ၏ ဖေစ်ဘွခ်တွင်ရေးသားသည်။
ဆက်လက်ပြီး ၎င်းက “စစ်အာဏာရှင်က နိုင်ငံကို ထိန်းချုပ်ထားပြီလို့ ပြောတာဟာ ကြီးလွန်းတဲ့ နာကျင်မှုကို သယ်ပိုးထားရတဲ့ ပြည်သူကို ထပ်ပြီး အနာတရဖြစ်အောင် လုပ်လိုက်တာပါ မစ္စသံတမန်ကြီးခင်ဗျား” ဟုလည်းဆက်ပြောသည်။
ကုလအထူးကိုယ်စားလှယ်၏ CNA ကို ဖြေကြားမှုအပေါ် ဥရောပဆိုင်ရာကရင်အဖွဲ့အစည်း(European Karen Network)က ငြင်းပယ်ကန့်ကွက်ခဲ့ပြီး မြန်မာစစ်တပ်က နိုင်ငံရှိ ပြဿနာများ၏ အကြောင်းရင်းခံဖြစ်သည်ကို ကုလအထူးကိုယ်စားလှယ်က အမှန်တကယ်နားမလည်ကြောင်း ထောက်ပြဝေဖန်သည်။
“ဗမာစစ်တပ်ဟာ ကရင်လူမျိုးတွေကို နှစ် ၇၀ ကျော်တိုက်ခိုက်ခဲ့တယ်။ အပြည်ပြည်ဆိုင်ရာဥပဒေတွေနဲ့ ဆန့်ကျင်တဲ့၊ မရေမတွက်နိုင်တဲ့ ချိုးဖောက်မှုတွေကို ကျွန်မတို့တွေအပေါ် ကျူးလွန်ခဲ့ တယ်။ ညှင်းပန်းဖိနှိပ်သူတွေ အာဏာဆက်ရှိရေး နည်းလမ်းရှာဖွေပေးတာက ကုလအထူးကိုယ် စားလှယ်ရဲ့ အလုပ်မဟုတ်ပါဘူး” ဟု European Karen Network ဥက္ကဌ နန်းကြည်အေးက ပြောသည်။