ကန့်ဘလူမြို့နယ် ကိုးတောင်ဘို့ ကျေးရွာအုပ်စု အတွင်းသို့ စစ်ကောင်စီတပ်များ ဝင်ရောက်စီးနင်းလာ၍ ရွာသူရွာသားများ စစ်ဘေးတိမ်းရှောင်နေရကြောင်း ဒေသခံအချို့က ပြောသည်။
အဆိုပါ ဒေသသို့ ဖေဖော်ဝါရီ ၂ရက်ကတည်းက စစ်ကောင်စီတပ်မှ အင်အားအများအပြားဖြင့် ဝင်ရောက်လာ၍ ဒေသခံများ ထွက်ပြေးတိမ်းရှောင်နေရခြင်းဖြစ်သည်။
“အရှေ့တောင်ရိုး အနောက် ဒေါင်းမြူးဘက်ထိ ဝင်မွှေနေပါတယ်။ လျှော်ဖြူကုန်း ကိုင်းမ၊ ကျွန်းကုန်း၊ ကွက်သစ် ၊ ပေါက်ကုန်း၊ ပိတောက်ခုံ၊ ကိုးတောင်ဘို့ ရွာမ စစ်ဘေးရှောင်နေကြရပါတယ်” ဟုဒေသခံတစ်ဦးကပြောသည်။
ဖေဖော်ဝါရီ ၂ရက်ညပိုင်းတွင် ကိုးတောင်ဘို့ရွာသို့ ဝင်ရောက်လာသော စစ်ကောင်စီတပ်သားများက ယနေ့ ဖေဖော်ဝါရီ ၃ရက် နံနက်ပိုင်းတွင် ရပ်ကွက်များအတွင်း လှည့်လည်၍ ရပ်ကွက်အတွင်း ကျန်ရှိနေသော ရွာသူရွာသား ၂၀ကျော်ကို ဖမ်းဆီးကာ ညနေပိုင်းတွင် ပြန်လွှတ်ပေးခဲ့ကြောင်း Kotaungbo Revolution က သတင်းထုတ်ပြန်သည်။
Public Service Announcement
ညနေ ၄နာရီခန့်တွင် ကျေးရွာဘုန်းကြီးကျောင်း တွင်တပ်စွဲထားသောစစ်ကောင်စီတပ်က ကျောင်းအ၀မှ ကျေးရွာများဘက်သို့ သေနတ်များ ပစ်ဖောက်ခဲ့သည်။
ကိုးတောင်ဘို့ ဒေသကာကွယ်ရေးတပ်ဖွဲ့ကလည်း အရေးကြီးအခြေအနေ ရောက်နေပြီဖြစ်၍ ကျေးရွာအုပ်စုအတွင်းမှ အမြန်ဆုံးထွက်ခွာရန် ရွာသူရွာသားများကို ယမန်နေ့ကတည်းက သတိပေးထားသည်။
ကိုးတောင်ဘို့ရွာသည် ဖေဖော်ဝါရီ ၁ရက်က တစ်နိုင်ငံလုံး အတိုင်းအတာ ပြုလုပ်ခဲ့သည့် အသံတိတ် သပိတ်တွင် စျေးဆိုင်များ ပိတ်ကာ ပါဝင်ခဲ့သည့် ရွာတစ်ရွာဖြစ်သည်။
