မကွေးတိုင်း၊ဂန့်ဂေါမြို့နယ်၊ ဂန့်ဂေါ-ကလေးလမ်းပိုင်းတွင် ရှောင်တခင်စစ်ဆေးမှုများပြုလုပ်နေစဥ် စစ်ကောင်စီထောက်တိုင်ထုတ်ကုန်များသိမ်းဆည်းရမိကြောင်း ပြည်သူ့ကာကွယ် ရေးတပ်ဖွဲ့ -ဂန့်ဂေါ က ယနေ့(ဖေဖော်ဝါရီ ၈ ရက်)တွင် ထုတ်ပြန်သည်။
အကြမ်းဖက်စစ်ကောင်စီထုတ်ကုန်များကို စစ်ဆေးတွေ့ရှိမှုမှာ ဖေဖော်ဝါရီလ(၅)ရက်နေ့ နံနက် ၁၀ နာရီက YGN 9L-5382 ယာဉ်နှင့် SGG 1I-6026ယာဉ် နှစ်စီးပေါ်မှ ဖြစ်သည်။ ဂေါ်ဇီလာလက်သန့်ဆေး၊ နို့ဆီ၊ကော်ဖီမစ်၊အချိုရည် အပါအဝင် စစ်တပ်ထုတ်ကုန်များကို စစ်ဆေးတွေ့ရှိ၍ ဖမ်းဆီးအရေးယူခဲ့ကြောင်း PDF (ဂန့်ဂေါ)ကပြောသည်။
“အကြမ်းဖက်စစ်တပ်နဲ့ ဆက်နွယ်နေတဲ့ ကုန် ပစ္စည်း တွေချည်းပါပဲ။ဂေါ်ဇီလာ ဆပ် ပြာ၊ အချိုရည်ဘူး၊နို့ဆီ အများစုပါတယ်။ကားကြီး နှစ်စီးတိုက်စာ အပြည့်ပဲ။ပစ္စည်းတွေကိုလောလောဆယ် ထိန်းသိမ်းထားဆဲပဲဗျ။ဘယ်လိုဆက်လုပ်မယ်ဆိုတာ ကျွန်တော်တို့ ဆုံးဖြတ်တဲ့အဆင့် မရောက်သေးဘူး”ဂန့်ဂေါ ပ.က.ဖ မှ တာဝန်ရှိသူတစ်ဦးက လူထုနွေဦးသို့ ပြောသည်။
လူသားချင်းစာနာသောအားဖြင့် အဆိုပါယာဉ်၊ယာဉ်မောင်းနှင့်ယာဉ်နောက်လိုက်တို့အား PDF-GanGaw ပြန်လည်လွှတ်ပေးခဲ့သည်ဟုထုတ်ပြန်ချက်တွင်ဖော်ပြထားသည်။
Public Service Announcement
ယာဉ်ပိုင်ရှင်၊ယာဉ်မောင်း၊ယာဉ်နောက်လိုက်နှင့်ကုန်စည်ကူးသန်းရောင်းဝယ်လျှက်ရှိကြသော မိဘပြည်သူများအနေဖြင့် စစ်ကောင်စီနှင့်ပတ်သက်လျှက်ရှိသောပစ္စည်းများ၊၎င်း၏ထောက်တိုင်များဖြစ်သည့်ထုတ်ကုန်များကို သယ်ယူခြင်း၊ကူးသန်းရောင်းဝယ်ခြင်းများမပြုလုပ်ကြရန် လည်း တိုက်တွန်းသည်။
စစ်ကာင်စီကနိုင်ငံ့အာဏာ မတရားသိမ်းယူခဲ့ပြီးငြိမ်းချမ်းစွာဆန္ဒပြတောင်ဆိုသူများကိုလည်းပစ်ခတ်သတ်ဖြတ်အကြမ်းဖက်ခဲ့ပြီးနောက်ပိုင်း စစ်တပ်ထုတ်ကုန်များကို ပြည်သူအများစုကသပိတ်မှောက်လာသလို၊ ပြည်သူ့ကာကွယ်ရေးတပ်ဖွဲ့များ၊တိုင်းရင်းသားလက်နက်ကိုင်အဖွဲ့များကပြည်သူများကို စစ်တပ်ထုတ်ကုန်များကိုမသုံးစွဲရန်နှင့် တွေ့ရှိပါက ဖျက်ဆီးခြင်းနှင့် အရေးယူခြင်းများကို တင်းတင်းကြပ်ကြပ် ပြုလုပ်လာကြသည်။
