ကရင်နီပြည်နယ် လွိုင်ကော်မြို့၊ဒေါဥခူရပ်ကွက်ရှိ စစ်ကောင်စီတပ်များ ကင်းပုန်းဝတ်နေသောနေရာကို ဝင်တိုက်ရာ စစ်ကောင်စီတပ်သားလေးဦးသေဆုံးကြောင်း ကရင်နီဒီမိုကရက်တစ်တပ်ဦး (KDF)မှ တာဝန်ရှိသူတစ်ဦးက လူထုနွေဦးသို့ ပြောသည်။
ထိုကင်းပုန်းစခန်းကို သုံးရက်ကြာလေ့လာပြီးနောက် ယမန်နေ့(ဖေဖော်ဝါရီ ၁၆ ရက်) ည ၈နာရီခွဲတွင် စတင်တိုက်ခိုက်ခဲ့သည်ဟု ၎င်းက ဆိုသည်။
“စစ်ခွေးတပ်နဲ့က ပေ၁၀၀နီးနီးပဲ ကွာတယ်။ယှဥ်ပစ်တာ။ဒါကြောင့် သူတို့ဘက်က လူဦးသေတယ်ဆိုတာ အတည်ပြုနိုင်တယ်။ဒဏ်ရာ ရတဲ့သူလည်းများတယ်။ တိုက်ပွဲက ၁နာရီကျော်ထိ ကြာတယ်”ဟု အထက်ပါတာဝန်ရှိသူက ရှင်းပြသည်။
အဆိုပါ တိုက်ပွဲတွင် ကရင်နီဒီမိုကရက်တစ်တပ်ဦး (KDF)နှင့် GZ-21 Loikaw PDF မဟာမိတ်ညီနောင်မြို့ပြပြောက်ကျားအဖွဲ့တို့မှ ဝင်ရောက်တိုက်ခိုက်ရာတွင် ရဲဘော်တစ်စုံတစ်ဦးမျှ ထိခိုက်ခဲ့ခြင်းမရှိဟုလည်း ၎င်းက အသိပေးသည်။
Public Service Announcement
ကရင်နီပြည်နယ်သို့ ဝင်ရောက်နိုင်သော လမ်းကြောင်းများနှင့် နယ်မြေများကို အကြမ်းဖက်စစ်ကောင်စီက ပိတ်ဆို့ထိုးစစ်ဆင်ရန် ပြင်ဆင်နေပုံအရ ရှေ့လာမည့်ရက်များမှာလည်း တိုက်ပွဲများပြင်းထန်လာမည်ဟု KDFက ခန့်မှန်းသည်။
ထို့အပြင် ရှမ်း-ကယား(ကရင်နီ)နယ်စပ်ရှိ မိုးဗြဲမြို့နယ်တွင် အကြမ်းဖက်စစ်ကောင်စီတက်က သာလွန်အင်အားဖြင့် စစ်ကြောင်းထိုးနေပြီး ဖေဖော်ဝါရီ ၁၆ ရက်ကစ၍ တိုက်ပွဲများပြင်းထန်နေသည်။
