အကြမ်းဖက်စစ်ကောင်စီတပ်များက စစ်ရှောင်စခန်းများရှိရာသို့ ထိုးစစ်ဆင်လာ၍ စစ်ဘေးတိမ်းရှောင်နေသူများအား ညတွင်းချင်း အရေးပေါ် ရွှေ့ပြောင်းပေးခဲ့ကြောင်း ဒီးမော့ဆို ပြည်သူ့ကာကွယ်ရေးတပ်(PDF) ၏ ဘဏ္ဍာငွေရှာဖွေရေးအဖွဲ့က ထုတ်ပြန်သည်။
ရှမ်း – ကယား(ကရင်နီ)ပြည်နယ် နယ်စပ်၌ ယခုရက်ပိုင်းအတွင်း တိုက်ပွဲဖြစ်ပွားလျက်ရှိရာ စစ်ကောင်စီတပ်က ဖေဖော်ဝါရီ ၂၀ရက်တွင် စစ်ရှောင်စခန်းဘက်သို့ ထိုးစစ်ဆင်လာ၍ ယင်းနေ့ညပိုင်း၌ ရွှေ့ပြောင်းရခြင်းဖြစ်သည်ဟု ဆိုသည်။
အရေးပေါ် ရွှေ့ပြောင်းရသည့် စခန်းသည် မည်သည့် ဒေသရှိစစ်ရှောင်စခန်း ဖြစ်သည်ကို ဖော်ပြမထားသော်လည်း ကလေးငယ်များအပါအဝင် ပြည်သူလူထုများ ညအချိန် အထုပ်အပိုးများဖြင့် ပြောင်းရွှေ့နေသည်ဓာတ်ပုံများကို ဖော်ပြထားသည်။
စစ်ကောင်စီတပ်၏ ထိုးစစ်ဆင်မှု၊ လက်နက်ကြီးပစ်ခတ်မှုနှင့် လေကြောင်းတိုက်ခိုက်မှုများကြောင့် ဒီးမော့ဆို၊လွိုင်ကော်၊ ဖရူဆို၊ ဖယ်ခုံ၊ မိုးဗြဲစသည့် ဒေသများမှ ပြည်သူလူထုများ ဘေးကင်းရာသို့ တိမ်းရှောင်နေကြရသည်။
Public Service Announcement
