ရှမ်း – ကယား(ကရင်နီ)ပြည်နယ် နယ်စပ်တိုက်ပွဲတွင် စစ်ကောင်စီကို ခုခံတိုက်ခိုက်နေသည့် ပြည်သူ့ကာကွယ်ရေးရဲဘော်များက တိုက်ပွဲဝင်နေရင်းဖြင့် စစ်ရှောင်များချန်ထားခဲ့သည့် နွားများကို အစားကျွေးမွေး၊ ရေတိုက်ခြင်းများ ပြုလုပ်၍စောင့်ရှောက်ပေးခဲ့သည်ဟု တိုက်ပွဲ၌ပါဝင်နေသည့် အလယ်ပိုင်းတိုင်း အထူးစစ်ဆင်ရေးအဖွဲ့က ထုတ်ပြန်သည်။
အကြမ်းဖက်စစ်ကောင်စီတပ်၏ ထိုးစစ်ဆင် စစ်ရေးလှုပ်ရှားမှုတွေကြောင့် ရှမ်း – ကယားနယ်စပ်၌ တိုက်ပွဲများ ပြင်းထန်နေသည်မှာ ခြောက်ရက်ဆက်တိုက်ရှိပြီဖြစ်သည်။
ဖေဖော်ဝါရီ ၁၆ရက်မှ ဖေဖော်ဝါရီ ၂၁ရက်အထိ မိုးဗြဲနှင့် အနီးဝန်းကျင်ဒေသများ၌ တိုက်ပွဲများဖြစ်ပွားခဲ့ရာ စစ်ကောင်စီတပ်သည် ကျေးရွာများအား မီးရှို့ဖျက်ဆီးခြင်း၊ လက်နက်ကြီးဖြင့်ပစ်ခတ်ခြင်းများလုပ်ဆောင်ခဲ့သည်။ ထို့ပြင် လေကြောင်းတိုက်ခိုက်မှုများလည်း အကြိမ်ကြိမ်ပြုလုပ်ခဲ့သည်။
စစ်ကောင်စီတပ်၏ အကြမ်းဖက်ထိုးစစ်ဆင်မှုများကြောင့်ဒေသခံထောင်နှင့်ချီ ဘေးလွတ်ရာသို့ တိမ်းရှောင်နေကြရပြီး စစ်ရှောင်ပြည်သူများ အနေဖြင့် အိမ်မွေး တိရိစ္ဆာန်များကိုနေအိမ်ခြံထဲ၌ ထားရစ်ခဲ့ခြင်း၊လမ်းမတွေပေါ်လွှတ်ထားခြင်းများပြုလုပ်ထားသည်ကို အလယ်ပိုင်းတိုင်းအထူးစစ်ဆင်ရေးအဖွဲ့ ထုတ်ပြန်သည့် ဓာတ်ပုံများ၌ တွေ့ရသည်။