ငါန်းဇွန်က စစ်ရှောင်ကလေးတွေ ပညာသင်ဖို့ စာရေးကိရိယာတွေ လိုအပ်နေ

ဇန်နဝါရီ ၁၈၊ ၂၀၂၆ ဇေအောင်/People’s Spring

မန္တလေးတိုင်း၊ ငါန်းဇွန်မြို့နယ်မှာ စစ်ဘေးရှောင် ကလေးငယ် ၅၀ ကျော်ဟာ ပညာသင်ကြားဖို့အတွက် စာရေးကိရိယာတွေ လိုအပ်နေကြောင်း စစ်ရှောင် ကူညီပေးနေသူတွေက ပြောပါတယ်။

ငါန်းဇွန်မြို့နယ်တနေရာမှာ ယာယီဖွင့်လှစ်ထားတဲ့ စာသင်ခန်းမှာ စစ်ရှောင်ကလေးငယ် ၅၀ ကျော်အတွက် စာအုပ်၊ ခဲတံနဲ့ အခြား စာရေးကိရိယာတွေ လိုအပ်နေတယ်လို့ စစ်ရှောင် ကူညီပေးနေသူတစ်ဦးက ပြောပါတယ်။

“စာအုပ်ဖိုး၊ ခဲတံဖိုးလေးတွေ လိုအပ်နေတာ။ အခုလက်ရှိစာသင်ပေးနေတာလည်း ဆရာ၊ ဆရာမက လက်ရှိ ပိုက်ဆံမယူဘဲ အခမဲ့သင်နေပါတယ်”လို့ စစ်ရှောင်ကူညီသူက ပြောပါတယ်။

Public Service Announcement

အဆိုပါ ကလေးငယ်တွေဟာ ငါန်းဇွန်မြို့နယ်၊ ငါန်းမြာကြီးကျေးရွာ၊ ရပ်ကွက် ၁၂ရက်ကွက်က မူလတန်းအရွယ် က​လေးငယ်တွေဖြစ်ကြောင်း၊ မနှစ်ကတည်းက စတင်သင်ကြားပေးခဲ့တာဖြစ်ပြီး ကြားထဲ ယာယီရပ်နားခဲ့ရပေမဲ့ ယခုအခါ ပြန်လည်သင်ကြားပေးနေပြီဖြစ်ကြောင်း စစ်ရှောင်ကူညီသူတွေဆီက သိရပါတယ်။

ငါန်းမြာကြီးရွာက စစ်ရှောင်ပြည်သူတွေဟာ စစ်ရှောင်နေရတာ တစ်နှစ်ခွဲကျော်လာပြီဖြစ်ပြီး စစ်ရှောင်ဦးရေ တစ်ထောင်ကျော်ရှိနေကာ အကူအညီတွေ လိုအပ်နေတယ်လို့ စစ်ရှောင် ကူညီပေးနေသူတွေက ပြောပါတယ်။