နောင်ချိုမြို့ ကင်းစခန်းတိုက်ခိုက်ခံရမှု စစ်​ကောင်စီတပ်သား တစ်ဦး​သေ၊ ဒဏ်ရာရသူလည်းရှိဟုဆို

ရှမ်းပြည်နယ်​မြောက်ပိုင်း နောင်ချိုမြို့ ဘူတာရပ်ကွက် မီးရထားဘူတာ​ဘေးရှိ အကြမ်းဖက် စစ်ကောင်စီ၏ ကင်းစခန်း ယမန်​နေ့ညက တိုက်ခိုက်ခံရပြီး စစ်ကောင်စီတပ်သား တစ်ဦး​သေဆုံးပြီး ဒဏ်ရာရရှိသူများလည်းရှိ​ကြောင်း ​နောင်ချိုမြို့ PDF တပ်ဖွဲ့ဝင်တစ်ဦးက People’s Springသို့ ပြောသည်။

” ကျွန်​တော်တို့အဖွဲ့တိုက်တာ​တော့ မဟုတ်ဘူး။ ဒါ​ပေမယ့် ညီ​နောင်အဖွဲ့က တိုက်တာလို့သိရတယ်။ သူတို့ဘက်က တစ်​ယောက်​သေတယ်”ဟု ၎င်းက ​ပြော သည်။

ယနေ့(ဖေဖော်ဝါရီ ၂၃ ရက်) နံနက်​စော ၁နာရီခွဲတွင် ဘူတာရပ်ကွက် မီးရထားဘူတာ​ဘေးရှိ စစ်​ကောင်စီ ၏ ကင်းစခန်းတိုက်ခိုက်ခံရမှုတွင် အချိန် ၁နာရီခန့်ကြာ ပစ်ခတ်သံများကျယ်လောင်စွာထွက်ပေါ်ခဲ့သည်ဟု ​ဒေသခံများက ​ပြောသည်။

“ပြည်သူ့စစ်နဲ့ စစ်သား​တွေက ညတိုင်းလုံခြုံ​ရေးယူ စခန်းချ​နေတာ။ ဘူတာမှာပဲ။ အဲဒီ​နေရာမှာ လိုင်ခန်းအသစ်​ဆောက်​​နေကြတာ။ အဲဒီ​နေရာက​နေ PDF​တွေ တက်လာမှာဆိုးလို့ လုံခြုံ​ရေးယူထားတဲ့​နေရာ”ဟု ​နောင်ချိုမြို့ ​ဒေသခံတစ်ဦးက ​ပြောသည်။

Public Service Announcement

အဆိုပါတိုက်ခိုက်မှုကို ပြည်သူ့ကာကွယ်ရေးတပ် မတော်၊ မြောက်ပိုင်းတိုင်းစစ်ဌာနချုပ်မှ ပြုလုပ်ခြင်းဟု ကနဦး သတင်းထွက်ပေါ်နေသော်လည်း သက်ဆိုင်ရာတပ်ဖွဲ့များက ထုတ်ပြန်ခြင်းမရှိသေးပေ။

” ဒီ​နေ့နံနက် ​နောင်ချိုမြိုအ​ခြေ​နေမှာ ​စျေးဆိုင်များ ပုံမှန်အတိုင်းဖွင့်လှစ်​နေတယ်။ ဒါ​​ပေမယ့် လူသွား၊လူလာများနဲ့ ​စျေဝယ်သူက မရှိဘူး”ဟု ​နောင်ချို့မြို့ခံတစ်ဦးက ​ပြောသည်။

ထို့အပြင် ပြည်သူ့ကာကွယ်ရေးအဖွဲ့၏ ယခုတိုက်ခိုက်မှုကို ကြိုဆိုကြောင်း ဒေသခံများက ပြောသည်။ စစ်ကောင်စီထောက်တိုင် သတင်းသမားအမည်ခံအချို့ကမူ အမည်မသိလက်နက်ကိုင်အဖွဲ့က နောင်ချိုဘူတာကို တိုက်ခိုက်သွားသည်ဟု သတင်းအမှားများ ​ရေးသားနေသည်။

ရှမ်းပြည်နယ်မြောက်ပိုင်းသတင်းများကို မကြာခဏတင်နေသည့် Nay Myo အမည်ဖြင့် ဖေ့စ်ဘွတ်ခ်အသုံးပြုသူက အထက်ပါအတိုင်းတင်ထားရာ ဒေသခံအချို့က ပြင်းပြင်းထန်ထန်ဝေဖန်နေသည်။

Nay Myo အမည်ဖြင့် ဖေ့စ်ဘွတ်ခ်အသုံးပြုသူသည် လားရှိုးမြို့တွင်နေထိုင်သူဖြစ်ပြီး စစ်ကောင်စ်ီနှင့် နီးစပ်သူဖြစ်သည်။ စစ်ကောင်စီထုတ်ပြန်လိုသည့် သတင်းများကို ဖော်လိုဝါတစ်သိန်းကျော်ရှိနေသည့် ၎င်း၏ ဖေ့စ်ဘွတ်ခ်စာမျက်နှာမှတစ်ဆင့် ကြားခံထုတ်ပြန်ပေးနေသည်။