●ဖေဖော်ဝါရီ ၂၄ တွင်ပြည်တွင်းဒေါ်လာဈေးငြိမ်နေပြီး စက်သုံးဆီဈေးအနည်းငယ်စတက်
ရုရှားကယူကရိန်းနိုင်ငံကိုကျူးကျော်စစ်တိုက်ခိုက်ခြင်းကြောင့် ကမ္ဘာရွှေဈေးမြင့်တက်လာပြီး ပြည်တွင်းရွှေဈေးလည်း လိုက်ပါမြင့်တက်လာကာ အခေါက်ရွှေတစ်ကျပ်သားကျပ် ၁၉သိန်းခွဲခန့်အထိဈေးပေါက်လာသည်။
ယမန့်နေတွင် အခေါက်ရွှေတစ်ကျပ်သား ကျပ် ၁၉၀၄၀၀၀ကျပ်ပေါက်ဈေးရှိခဲ့သော်လည်း ယနေ့ (ဖေဖော်ဝါရီ ၂၄ရက်)တွင် တစ်ကျပ်သား ကျပ်လေးသောင်းကျော်တက်သွားပြီး ၁,၉၄၅,၀၀၀ကျပ်သို့မြင့်တက်လာသည်ဟု အောင်သမာဓီရွှေဆိုင်က ကြေငြာထားသည်။
“ဥရောပမှ စစ်ဖြစ်လာတော့ ကမ္ဘာ့ရွှေဈေးက တရက်တည်းကို ဒေါ်လာ ၅၀ကျော်လောက်တက်သွားတယ်၊ ဒါကြောင့် ပြည်တွင်းမှာလည်း ဈေးတက်လာတာ”ဟု ပြည်တွင်းရွှေလုပ်ငန်းရှင်တစ်ဦးကပြောသည်။
Public Service Announcement
ကမ္ဘာ့ရွှေဈေးသည် ယမန့်နေ့(ဖေဖော်ဝါရီ-၂၃ ရက်)တွင် ရွှေတစ်အောင်စကို ဒေါ်လာ ၁၈၉၅ ပေါက်ဈေးရှိခဲ့သော်လည်း ယနေ့တွင် တစ်အောင်စကို ဒေါ်လာ ၁၉၄၇ အထိမြင့်တက်လာသည်။
လက်ရှိကမ္ဘာစစ်ရေးအခြေအနေကြောင့် ရွှေဈေးနှင့် ဒေါ်လာဈေးမှာ အတက်အကျ မတည်မငြိမ်ဖြစ်နိုင်ပြီး ပြည်တွင်းရွှေဈေးမှာလည်း ဆက်လက်တက်ဖွယ်ရှိသည်ဟု ရွှေအရောင်းအဝယ်လုပ်ကိုင်သူတစ်ဦးကပြောသည်။
“ဒီတစ်ရက်တည်းမှာ တရှိန်ထိုးတက်လာ။အရင်ရက်တွေကတည်းက တဖြေးဖြေးတက်နေတာ အခုတော့ ဗြောင်းဆန်အောင် တက်သွားတာ”ဟု ၎င်းကဆက်ပြောသည်။
ရွှေဈေးမြင့်တက်လာသော်လည်း ပြည်တွင်းဒေါ်လာဈေးမှာ အတက်အကျသိပ်မရှိပေ ။ပြင်ပ မှောင်ခိုဈေးကွက်တွင် တစ်ဒေါ်လာကို ၁၉၆၅ကျပ်မှ ၁၉၈၀ကျပ်အတွင်းရှိနေသည်ဟုငွေလဲလုပ်ငန်းဆောင်ရွက်နေသူများထံမှ သိရသည်။
ရုရှား-ယူကရိန်းစစ်ပွဲကြောင့် စက်သုံးဆီလည်းမြင့်တက်လာပြီး ကမ္ဘာ့ဈေးကွက်တွင် ရေနံတစ်ပေပါကို ဒေါ်လာ ၁၀၀ အထိမြင့်တက်လာသည်။ ပြည်တွင်းဈေးကွက်တွင် အောက်တိန်း ၉၂ တစ်လီတာလျှင် ဖေဖော်ဝါရီ ၂၃ ရက်တွင် ၁၆၇၅ ကျပ်မှ ယနေ့တွင် ၁၇၂၀ကျပ်သို့တက်လာပြီး အောက်တိန်း ၉၅ တစ်လီတာမှာ ဖေဖော်ဝါရီ ၂၃ ရက်က ၁၇၃၀ ကျပ်မှ ယနေ့ တွင်၁၇၇၀ကျပ်သို့မြင့်တက်လာသည်။
