စစ်အာဏာရှင်စနစ်ဖျက်သိမ်းနိုင်မှသာ ပြည်သူလူထု ၏စိတ်ဖိစီးမှုများ ကျော်လွှားနိုင်မည်ဟု NUG ယာယီသမ္မတပြော

စစ်အာဏာရှင်စနစ် ဖျက်သိမ်းနိုင်မှသာ ပြည်သူလူထုခံစားနေရသည့် စိတ်ဖိစီးမှုများကို ကျော်လွှားနိုင်မည်ဖြစ်ကြောင်း အမျိုးသားညီညွတ်ရေးအစိုးရ(NUG) ယာယီသမ္မတ ဒူဝါလရှီးလက ပြောကြားသည်။

NUG ယာယီသမ္မတသည် ယနေ့(မတ်လ ၁၂ ရက်) ပြုလုပ်သော စိတ်ကျန်းမာရေးဆိုင်ရာကွန်ဖရင့်သို့ အမှာစကားပြောကြားစဉ် ပြည်သူများအနေဖြင့် မိမိတို့၏ ခံယူချက်၊ ယုံကြည်ချက်များကို မြဲမြံစွာစွဲကိုင်ထားရန် လိုအပ်ကြောင်း ထည့်သွင်းပြောကြားသည်။

အာဏာရှင်မင်းအောင်လှိုင်နှင့် စစ်အုပ်စုအပေါင်းအပါများကို တွန်းလှန်ပြီး နွေဦးတော်လှန်ရေး အောင်မြင်နိုင်ရန်အတွက် ပြည်သူတစ်ဦးချင်းစီ၏ စိတ်ကျန်းမာရေးသည် အလွန်အရေးကြီးကြောင်းလည်း ယာယီသမ္မတဒူဝါလရှီးလက ပြောသည်။

လက်ရှိတွင် မြန်မာပြည်သူပြည်သားများအားလုံးအတွက် စိတ်ကျန်းမာရေးသည် အလွန်အရေးကြီးသည့်ကာလအခြေအနေသို့ ရောက်ရှိနေပြီး အကြမ်းဖက် စစ်ကောင်စီ၏ မတရား အာဏာသိမ်းရန်ကြံရွယ်ချိန်မှစပြီး ပြည်သူလူထု၏ အနာဂတ်အမှောင်ဖုံးခဲ့ရကာ မတရားဖိနှိပ်ချုပ်ချယ်မှု၊ ညှင်းပန်းနှိပ်စက်မှုများကို ခုခံတွန်းလှန်ခဲ့ရကြောင်း NUG ယာယီသမ္မတက ပြောသည်။

Public Service Announcement

COVID-19 ကပ်ရောဂါ အပြင် တပ်ဆိုး၊ တပ်ဘေးကိုလည်း ခံနေရသည့်အတွက် လူမှုရေး၊ စီးပွားရေး၊ ကျန်းမာရေး သက်ရောက်မှုများကြောင့် စိတ်ဖိစီးမှုများကို ပိုမိုခံစားလာရသော်လည်း ထိုစိတ်ဖိစီးမှုများကို ကျော်လွှားနိုင်ဖို့အတွက် ယုံကြည်ချက်၊ ရည်မှန်းချက်၊ ခံယူချက်အပြည့်ဖြင့် ဖက်ဒရယ်ဒီမိုကရေစီစနစ်ကို တည်ထောင်နိုင်ရေး အားတင်းကျော်လွှားရမည်ဖြစ်ကြောင်း ၎င်းက ဆက်လက်တိုက်တွန်းသည်။