စစ်အာဏာရှင် မင်းအောင်လှိုင်က မြန်မာပြည်သူများကို အစုလိုက်၊အပြုံလိုက် သတ်ဖြတ်နေပြီး စစ်တပ်က လူမျိုးတုံးသတ်ဖြတ်မှု ဆက်လက်ကျူးလွန်နေကြောင်း အမေရိကန် ဘတ်စကတ်ကစားသမား အီနက်စ်ကန်တာက ထုတ်ဖော်ပြောဆိုသည်။
အထက်ပါ အမေရိကန်ဘတ်စကတ်အကျော်အမော်က ၎င်း၏ တွစ်တာနှင့် ဖေ့စ်ဘွတ်ခ် လူမှုကွန်ရက်နှစ်ခုစလုံးမှ မြန်မာနိုင်ငံအခြေအနေကို ရေးသားခြင်းဖြစ်ပြီး ငြိမ်းချမ်းစွာဆန္ဒပြသူ ၁,၆၀၀ကျော်ကို စစ်တပ်က သတ်ဖြတ်ခဲ့ကြောင်း ဖော်ပြသည်။
“မြန်မာနိုင်ငံမှာဖြစ်ပျက်နေတာက ကမ္ဘာပေါ်မှာဆက် လက်ဖြစ်ပေါ်နေတဲ့အဆိုးရွားဆုံးလူ့အခွင့်ရေးချိုးဖောက်မှုတွေထဲက တစ်ခုအပါအဝင်ပါပဲ” ဟု အီနက်စ်ကန်တာက ဆိုသည်။
‘မင်းအောင်လှိုင် လူသတ်ကောင်’၊ ‘အာဏာရှင်စနစ်ကိုငြင်းဆန်ရေး’၊ ‘စစ်အာဏာရှင်စနစ်အဆုံးသတ်ရေး’၊ ‘လူ့အခွင့်အရေး လေးစားရေး’ စသည့်တောင်းဆိုမှုများကိုလည်း အီနက်စ်ကန်တာက ဖိနပ်တွင် သရုပ်ဖော်ရေးသားထားသည်။
တူရကီနိုင်ငံဖွား အသက်(၂၉)နှစ်အရွယ် အီနက်စ်ကန်တာသည် လက်ရှိတွင် NBA မှ ဘောစတွန် ဆဲလ်တစ်အသင်းတွင် ကစားနေပြီး လူ့အခွင့်အရေးတက်ကြွလှုပ်ရှားသူဖြစ်ကာ တရုတ်သမ္မတရှီကျင့်ဖျင်ကိုလည်း လူမဆန်သည့်အာဏာရှင်အဖြစ် ရှုတ်ချခဲ့ဖူးသည်။