ချင်း နှင့် အိန္ဒိယနယ်စပ်တွင် ချင်းအမျိုးသားတပ်မတော် (CNA)နှင့် ဇိုမီးတော်လှန်ရေးတပ်(ZRA)တို့ကြားယမန်နေည( မတ် ၂၃ ရက်ည)ပိုင်းကတိုက်ပွဲဖြစ်ပွားခဲ့ပြီး CNAမှ တပ်သားတစ်ဦးကျဆုံးခဲ့ကြောင်း ဒေသခံကာကွယ်ရေးတပ်နှင့် နီးစပ်သူတစ်ဦးကပြောသည်။
ယမန့်နေ့ (မတ် ၂၃ ရက်) ည ၆နာရီခွဲမှ ၇ နာရီအထိတိုက်ပွဲဖြစ်ပွားခဲ့ခြင်းဖြစ်ပြီး ZRAက CNAစစ်ဆေးရေးဂိတ်တစ်ခုကို ဝင်ရောက်တိုက်ခိုက်ခဲ့ခြင်းဖြစ်သည်ဟု ၎င်းကဆက်ပြောသည်။
ZRAက ဝင်ရောက်တိုက်ခိုက်သည့်နေရာသည် CNAက ဖွင့်ထားသည့် စစ်ဆေးရေးဂိတ်ဖြစ်ပြီး တပ်သားနှစ်ဦးတည်း လုံခြုံရေးချထားသည့်နေရာဖြစ်သည်။
“တပ်သားနှစ်ယောက်တည်းရှိတဲ့ ဂိတ်ကို ဝင်ပစ်တာ၊ တစ်ယောက်ကျသွားတယ်။ တယောက်တော့ လွတ်သွားတယ်”ဟု ဒေသခံတစ်ဦးကပြောသည်။
ထိုတိုက်ပွဲတွင် CNAမှ ရဲဘော် ဆလိုင်းတွန်ပဲန်လျန်းကျဆုံးခဲ့ကြောင်း CNAကလည်း သတင်းထုတ်ပြန်ထားသည်။
ZRAသည် အိန္ဒိယနိုင်ငံ၊ မဏီပူပြည်နယ်တွင် ခြေကုတ်ယူသည့် လက်နက်ကိုင်တပ်ဖွဲ့တစ်ခုဖြစ်ပြီး အကြမ်းဖက်စစ်ကောင်စီ၏ မဟာမိတ် လက်နက်ကိုင်တပ်ဖွဲ့တစ်ခုဖြစ်ပြီး၊အကြမ်းဖက်စစ်ကောင်စီကို ခုခံတော်လှန်နေသောဒေသလခံလက်နက်ကိုင်အဖွဲ့များကို မကြာခဏတိုက်ခိုက်နှောက်ယှက်နေသောအဖွဲ့ဖြစ်သည်။
၂၀၂၁ မေ ၂၂ ရက်တွင်ZRA က တီးတိန်မြို့ အခြေစိုက် PDFတပ်စခန်းတစ်ခုကို ဝင်ရောက်သိမ်းပိုက်ခဲ့ဖူးသည်။ ထိုပြင် ၂၀၂၁ဇွန်လတွင်လည်း PDF(Zoland)၏ တပ်စခန်းတစ်ခုကို ထပ်မံဖျက်ဆီးခဲ့သည်။ ၂၀၂၁ စက်တင်ဘာလတွင် တီးတိန်မြို့နယ်အတွင်းရှိ CDF-Hualngo စခန်းကိုလည်း ဝင်ရောက်တိုက်ခိုက်ခဲ့သည်။ ထိုအပြင် ၂၀၂၁ ဒီဇင်ဘာ ၅ ရက်တွင် PDF(Zoland) ခေါင်းဆောင် ကျင်ရှန်းဆွပ်ကို ZRAက တီးတိန်မြို့ပေါ်တွင် ချိန်းဆိုပြီးလုပ်ကြံသတ်ဖြတ်ခဲ့သည်။
ထိုကြောင့်ဒီဇင်ဘာ ၁၇ ရက်တွင်လည်း အိန္ဒိယ-မြန်မာနယ်စပ်တွင် CNAနှင့် ZRAတို့ တိုက်ပွဲဖြစ်ပွားခဲ့သေးသည်။