စစ်ကိုင်းတိုင်း မင်းကင်းမြို့နယ်၊ တောင်တွင်းဒေသ ကျော်ကျေးရွာတွင် တပ်စွဲထားသော အကြမ်းဖက်စစ်အုပ်စုကို ဒုတိယအကြိမ်ဝင်တိုက်ရာ စစ်ကောင်စီတပ်သားနှင့် ပျူစောထီးခုနစ်ဦး သေဆုံးကြောင်း KLG PDFက ထုတ်ပြန်သည်။
ယနေ့(မတ်လ ၂၆ ရက်) နံနက် ၆နာရီ မှ၉နာရီခွဲခန့်အထိ ကြာမြင့်ခဲ့ကာ KLG PDF ၊ GTF PDF ရွှေသမင်မုဆိုးPDF၊ ကနီတပ်ရင်း(၂) ၊ မင်းကင်းတပ်ရင်း(၂)နှင့် ဒေသခံ(ပကဖ)တို့ဖြင့် စုပေါင်းတိုက်ခိုက်ခဲ့သည်ဟု ဆိုသည်။
“ကလေးဝဘက်က စခ စစ်ကူကားနှစ်စီး ဆင်းလာလို့ ကျွန်တော်တို့ တပ်ပြန်ဆုတ်ခဲ့ရတယ်။ ဒီအတိုင်း တပ်ကူမလာရင် ကျွန်တော်တို့ ဝင်စီးနိုင်လောက်တယ်။လောလောဆယ် ရဲဘော်တွေလည်း အထိအခိုက်မရှိ ပြန်ဆုတ် ခွာလာနိုင်အောင်ပဲ ကြိုးစားခဲ့တယ်”ဟု KLG PDF တာဝန်ရှိသူက လူထုနွေဦးသို့ ပြောသည်။
ကျော်ကျေးရွာ၌ စစ်ကောင်စီတပ်သား၂၀မှ ၃၀ကြားသာရှိပြီး ပျူစောထီးအရေအတွက်မှာ ၈၀ဝန်းကျင်ရှိကြောင်း KLG PDFက ခန့်မှန်းသည်။
မတ်လ၂၃ ရက်ကလည်း ကျော်ကျေးရွာကို ဒေသတွင်းကာကွယ်ရေးအဖွဲ့များပူးပေါင်းတိုက်ခိုက်ခဲ့ရာ အကြမ်းဖက်စစ်ကောင်စီတပ်ဘက်မှ ၈ဦးထက်မနည်းသေဆုံးပြီး ပြည်သူ့ကာကွယ်ရေးတပ်ဖွဲ့ဝင်နှစ်ဦး ကျဆုံးခဲ့သည်။
တောင်တွင်းဒေသအတွင်း အကြမ်းဖက်စစ်ကောင်စီတပ် နှင့် ပြည်သူ့ကာကွယ်ရေးပူးပေါင်းတပ်များအကြား ထိတွေ့တိုက်ပွဲများ ဆက်တိုက်ဖြစ်ပွားနေပြီး ဆက်လက်၍ နေရာမရွေး တိုက်ပွဲများဖြစ်နိုင်သည့်အတွက် မင်းကင်းမြို့နယ်၊ တောင်တွင်း -ကလေးဝ ကားလမ်းပိုင်းကို ယာယီပိတ်ပင်ကြောင်း TDPDF(MinGin)က ယမန်နေ့ ညပိုင်းတွင် ထုတ်ပြန်ထားသည်။