မြန်မာပြည်သူများအတွက် ကန်ဒေါ်လာ ၉၅သန်းကျော် ဩစတြေးလျအစိုးရ ထပ်မံကူညီမည်

ဩစတြေးလျအစိုးရက ယခုဘဏ္ဍာနှစ်တွင် မြန်မာပြည်သူများအတွက် အမေရိကန်ဒေါ်လာ ၉၅သန်းကျော် ထပ်မံအကူအညီပေးမည်ဟု အထက်လွှတ်တော်အမတ် Dean Smith က ပြောကြားသည်။

ဩစတြေးလျဝန်ကြီးချုပ်က မြန်မာနိုင်ငံတွင် စစ်အာဏာသိမ်းမှုနှင့်ပတ်သက်၍ ၎င်းတို့အစိုးရ၏ ချဉ်းကပ်မှုသည် ရှင်းလင်းပြတ်သားပြီး ဒုက္ခသည်စခန်းများတွင် မြန်မာများအတွက် အကူအညီပေးအပ်ခြင်း၊ လူသားချင်းစာနာမှုအစီအစဉ်အောက်တွင် နောက်ထပ် ဗီဇာ ၂၀၀၀ ပေးအပ်ခြင်းများပါဝင်ကြောင်း အထက်ပါလွှတ်တော်အမတ်က သတင်းစကားပါးသည်။

မကြာသေးမီက အမျိုးသားညီညွတ်ရေးအစိုးရ(NUG) ပြည်ထောင်စုဝန်ကြီးသုံးဦးနှင့် ဩစတြေးလျလွှတ်တော်၊ နိုင်ငံခြားရေး၊ ကာကွယ်ရေးနှင့် ကုန်သွယ်ရေးဆိုင်ရာ ပူးပေါင်းကောင်မတီ၏ နိုင်ငံခြားရေးရာ ဆပ်ကော်မတီတို့သည် မြန်မာ့အရေးတွေ့ဆုံဆွေးနွေးခဲ့ပြီး အထူးအကျိုးရှိသည့် အစည်းအဝေးတစ်ခုအဖြစ် မှတ်တမ်းတင်နိုင်ကြောင်း NUGက သတင်းထုတ်ပြန်ထားသည်။

အထက်ပါအစည်းအဝေးသို့ နိုင်ငံခြားရေးဝန်ကြီး ဒေါ်ဇင်မာအောင်၊ လူသားချင်း စာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီး ဒေါက်တာဝင်းမြတ်အေး၊ လူ့အခွင့်အရေးဆိုင်ရာဝန်ကြီး ဦးအောင်မျိုးမင်းနှင့် ဩစတြေးလျနိုင်ငံဆိုင်ရာ ကိုယ်စားလှယ် ဒေါက်တာ ထွန်းအောင်ရွှေတို့ တက်ရောက်ခဲ့သည်။

Public Service Announcement

ဩစတြေးလျသည် တရားမဝင်အာဏာသိမ်းမြန်မာစစ်တပ်ကို တစ်နှစ်ကျော်ချိန်အထိ ပိတ်ဆို့ အရေးယူမှုမရှိသေးသော်လည်း အကြမ်းဖက်စစ်တပ်ကို စွန့်ခွာလာသည့် CDM စစ်သားများကို စတင်လက်ခံနေပြီဖြစ်သည်။