မြေပြင်စိုးမိုးရေး တည်ဆောက်နိုင်ရန် အရေးကြီးကြောင်း ယာယီသမ္မတ ပြောကြား

အမျိုးသားညီညွတ်ရေးအစိုးရ၏ (၄၈)ကြိမ်မြောက် အစိုးရအဖွဲ့အစည်းအဝေးကို ယနေ့နံနက်က ပြုလုပ်ခဲ့ရာ ယာယီသမ္မတက အထက်ပါအတိုင်း ပြောကြားသည်။

NCGUBအနေဖြင့် နိုင်ငံတကာအရေး၌ အောင်မြင်မှုများရခဲ့သော်လည်း မြေပြင်စိုးမိုးရေးကို မတည်ဆောက်နိုင်ခဲ့၍ ရပ်တန့်သွားခဲ့ရကြောင်း ယာယီသမ္မတက ပြော သည်။

“ဒါကို အစိုးရအဖွဲ့အနေနဲ့ သင်ခန်းစာယူရမယ်၊ ၁၉၉၀ မှာ NCGUBကို ချေမှုန်းသလို ကျွန်​တော်တို့ကိုလည်း ချေမှုန်းဖို့ လုပ်နေတာကြောင့် ကျနော်တို့ရဲ့ အတွေ့အကြုံအရ မြေပြင်စိုးမိုးရေးကို ရရှိအောင်လုပ်ရမှာ အရေးကြီးတယ်၊ မြေပြင်မှာ စီမံခန့်ခွဲမှုလုပ်နိုင်ဖို့က အမျိုးသားညီညွတ်ရေးအစိုးရအတွက် အလွန်အရေးကြီးတယ်၊ နယ်မြေစိုးမိုးရေးအတွက် ပစ္စည်းတွေ၊ ငွေတွေ အင်မတန်အရေးတယ်၊ အဲဒါတွေကို ဦး စားပေးလုပ်ဆောင်ရမယ်၊ ကြားကာလမှာ လုပ်ရမှာက စစ်ကောင်စီပြုတ်ကျရေးဖြစ်တယ်။ မြေပြင်မှာလုပ်ရမယ့်ကိစ္စတွေကို အထူးအလေးထားပြီး လုပ်ဆောင်ဖို့ ထပ်လောင်းပြောကြားလိုတယ်” ဟု ယာယီသမ္မတ ဒူဝါလရှီးလက ပြောကြားခဲ့ကြောင်း NUG သတင်းနှင့် ပြန်ကြားရေး PVTVက သတင်းဖော်ပြသည်။

NUG အနေဖြင့် ရိုဟင်ဂျာအရေးကို ပစ်ပယ်မထားဘဲ အလေးထား လုပ်ဆောင်သွားမည်ဖြစ်ကြောင်း၊ ထို့ပြင် NUG၏ လုပ်ဆောင်ချက်များ အရှိန်အဟုန်မကျအောင် ဝိုင်းဝန်းကြိုးစားကြရန်လိုအပ်ကြောင်း၊ ရုန်းကန်ရသည့် အမှန်တရားကို ကမ္ဘာနှင့်ပြည်သူကို အသိပေးရန်လိုကြောင်း ယာယီသမ္မတက ပြောသည်။

Public Service Announcement

“ရုန်းကန်ရတဲ့ အမှန်တရားကို ကမ္ဘာကိုသိစေပြီးတော့ ကမ္ဘာနဲ့ လက်တွဲပြီးတော့ အမြန်ဆုံး စစ်ကောင်စီကို ချေမှုန်းပြီး ဖြုတ်ချပြီးတော့ မြန်မာနိုင်ငံသစ်ကို အမြန်ဆုံးထူထောင်ရမယ်။ ပြည်သူလူထုကိုလည်း အားပေးရမယ်၊ ကိုယ်တိုင်လည်း စိတ်ခွန်အားမြှင့်အောင်လုပ် ရမယ်”ဟု ဒူဝါလရှီးလက ပြောကြားသည်။

ပြည်ထောင်စုဝန်ကြီးချုပ်မန်းဝင်းခိုင်သန်းကလည်း ပိုမိုကောင်းမွန်သည့် တော်လှန်ရေး အဆုံးသတ်အတွက် စစ်ရေးကဏ္ဍ၊ အုပ်ချုပ်ရေးကဏ္ဍ၊ နိုင်ငံခြားရေး ကဏ္ဍ၊ ဘဏ္ဍာရှာဖွေရေးကဏ္ဍစသဖြင့် ကဏ္ဍစုံက ဆက်လက်အားစိုက်ဆောင်ရွက် ပေးကြရန် တိုက်တွန်းပြောကြားခဲ့သည်။