ချင်းပြည်နယ် မတူပီအခြေစိုက် ခလရ(၃၀၄)တပ်နှင့် တိုက်ပွဲပြင်းထန်နေ ကြောင်း CDF- မတူပီက ထုတ်ပြန်သည်။
ယနေ့(မတ်လ ၃၁)နံနက် ၇ နာရီကျော်မှစပြီး ကျောက်ထုမှ မတူပီမြို့သို့ စစ်အင်အား ဖြည့်တင်းရန်လာသော ယာဉ်တန်းကို ခလရ (၃၀၄)မှ ဆင်းကြိုစဥ် CDFနှင့် ထိတွေ့တိုက်ပွဲ ဖြစ်ပွားခဲ့ခြင်းဟု ဆိုသည်။
“၃၀၄ တပ်က ကောင်တွေက မနေ့ကစပြီး မတူပီကနေ ဆင်းတယ်။ ညက ခြမ်းပြန်းရွာသစ် တွင် ညအိပ်တယ်။အခု ခြန်းပြန်းရွာဟောင်းဘက်ကို သွားဖို့ လုပ်နေရင်းနဲ့ ထိတွေ့မှုဖြစ်နေတာ။နောက်ပြီး ၃၀၄ တပ်အထိုင်ကနေလည်း အမြှောက်နဲ့ပါပစ်ကူပေးနေတယ်။လောလောဆယ် အကြမ်းဖျင်းအဲဒီလောက်ပဲ သိရသေးတယ်”ဟု CDF မတူပီမှ တာဝန်ရှိသူက People’s Springသို့ ပြောသည်။
တိုက်ပွဲပြင်းထန်ဖြစ်ပွားနေမှုကြောင့် မင်းတပ်- မတူပီ လမ်းမတစ်လျှောက်ရှိ ဒေသခံပြည်သူ များလည်းဘေးလွတ်ရာသို့ ထွက်ပြေးတိမ်းရှောင်နေကြရ ကြောင်းလည်း အသိပေးသည်။
မတ် ၂၃ ရက်ကစ၍ တင့်ကား နှစ်စီးပါဝင်သည့် စစ်ကားအစီး ၈၀ကျော်မှာ ကျောက်ထု အမြှောက်တပ်မှ စတင်ထွက်ခွာလာခဲ့ခြင်း ဖြစ်သည်။
၎င်းတို့ထွက်ခွာရာလမ်းတစ်လျှောက်တွင် CDFမှ ကြားဖြတ်တိုက်ခိုက်မှုများ ပြုလုပ်ခဲ့ပြီး စစ်ကောင်စီတပ်သား ၂၀ ဦးခန့်သေဆုံးထားသည်။
လက်ရှိတွင် စစ်ကောင်စီ၏ စစ်ကားတန်းသည် မင်းတပ် – မတူပီလမ်းပိုင်း မိုင်(၄၀)တွင် ရှိနေပြီး မတူပီသို့ တက်ရန်ကြိုပမ်းနေဆဲဖြစ်ကာ စစ်ရဟတ်ယာဥ် တစ်စီးပါ ပျံသန်းနေသည်ဟု ဒေသတွင်းသတင်းရင်းမြစ်များက ဆိုသည်။