မကွေးတိုင်း ပေါက်မြို့နယ် ရေကျော်ရွာကို စစ်ကောင်စီတပ်က ယနေ့ မီးရှို့နေကြောင်းနှင့် ကျွန်းရင်းရွာကိုလည်း ရဟတ်ယာဉ်ဖြင့် တိုက်ခိုက်၍ အရပ်သားသေဆုံးထိခိုက်မှုရှိကြောင်း ပေါက်ဒေသခံတစ်ဦးက ပြောသည်။
“ကျွန်တော်တို့ရွာနဲ့ ရေကျော်ရွာရယ်ပေါ့။ ကျွန်တော်တို့ ကျွန်းရင်းက ပေါက်မြို့နယ် အစွန်ဆုံးမှာ။ ပေါက်ရယ် ၊ ပခုက္ကူရယ် ၊ ဆိပ်ဖြူရယ် ၃နယ် ဆုံတဲ့နေရာမှာ။ သူတို့က ဘယ်လိုကြောင့်လဲတော့ မသိဘူး ရဟတ်ယာဉ်နဲ့ လာပစ်တယ်။ စစ်ကြောင်းကလည်း သုံးကြောင်းလောက်နဲ့လာတာ။ လောလောဆယ် က ရေကျော်ရွာကိုတော့ မီးရှို့နေတယ်။ ၁၁ခွဲလောက်ကစပြီး။ အိမ်ခြေ ဘယ်နှလုံး ဘယ်လိုလောင်တယ် ဆိုတာ မသိရသေးဘူး။ ကျွန်တော်တို့ ကျွန်းရင်းရွာထဲမှာတော့ သက်ကြီးရွယ်အိုတစ်ဦး ရဟတ်ယာဉ်က ပစ်တာဗိုက်မှန်ပြီးသေတယ်။ ထိခိုက်ဒဏ်ရာတွေလည်းရှိတယ်”ဟု ကျွန်းရင်းရွာခံတစ်ဦးက ပြောသည်။
မည်သည့်အတွက်ကြောင့် စစ်ကြောင်းထိုးလာသည်ကို အသေးစိတ်မသိရသေးကြောင်း၊ ယခင်ကလည်း စစ်ကြောင်းထိုး ဝင်ရောက်လာမှုကြောင့် ကျွန်းရင်းရွာခံများ နှစ်ကြိမ်ထွက်ပြေးတိမ်းရှောင်ရဖူးကြောင်း ၎င်းက ဆိုသည်။
“ရှောင်နေကြရပြီ။ကျွန်တော်တို့ ရွာတစ်ရွာတင်မကဘူး ဒီနားကရွာ လေးငါး ခြောက်ရွာလောက် ရှောင်လိုက်ရတာ။ မနက်မိုလင်းလင်းချင်း စစ်ကြောင်းထိုးတာဆိုတော့ ၈နာရီလောက်က စရှောင်ကြတာ” ဟု ကျွန်းရင်းရွာခံက ပြောသည်။
Public Service Announcement
လတ်တလောတွင် အဆိုပါဒေသ၌ လမ်းပိုင်းအချို့ကို အသုံးမပြုရန် ပြည်သူများအား ဒေသခံပြည်သူ့ကာ ကွယ်ရေးတပ်က သတိပေးထားသည်။
ပေါက်- ဆိပ်ဖြူလမ်းနှင့် မြေနီလမ်းအား ယနေ့ ဧပြီ ၇ရက်မှစ၍ လုံး၀အသုံးမပြုရန် ပေါက် ပြည်သူ့ကာကွယ်ရေးတပ်(PDF) တပ်ရင်း(၄)က ယနေ့ နံနက်ပိုင်း၌ ထုတ်ပြန်ထားသည်။
