စစ်ကြောင်းကို မတိုက်ခိုက်ပါက ရွာကိုဒုက္ခမပေးဟုပြောသော်လည်း ညပိုင်း၌ မီးရှို့သွားခြင်းဖြစ်ဟု ဒေသခံပြော
မန္တလေးတိုင်း မတ္တရာမြို့နယ် ကင်းရွာကို အကြမ်းဖက်စစ်ကောင်စီတပ်က ယမန်နေ့ ညပိုင်းက မီးရှို့ ခဲ့ရာ နေအိမ် ငါးလုံးမီးလောင်ပျက်စီးခဲ့သည်ဟု ဒေသခံက ပြောသည်။
ဧပြီ ၈ရက် ညပိုင်း ၁၁နာရီခွဲတွင် စစ်ကောင်စီတပ်များက မီးရှိုခဲ့ခြင်းဖြစ်ပြီး နေအိမ် ငါးလုံးကို ရွေး၍ ရှို့ခဲ့သည်ဟု ဆိုသည်။ စစ်ကောင်စီတပ်သည် မီးမရှို့မီ ဧပြီ ၈ရက် ညနေပိုင်းတွင် ကင်းရွာ သူရွာသားများကိုခေါ်ယူပြီး ၎င်းတို့ကို မတိုက်ခိုက်ပါက ရွာကိုဒုက္ခမပေးဟု ပြောဆိုခဲ့ကြောင်း ဒေသခံက ပြောသည်။
“ရွာကိုလည်း မီးရှို့ဘူး ကျွန်တော်တို့လည်း ဒုက္ခမပေးနဲ့အနှောက်အယှက် မပေးနဲ့ပေါ့ ကျွန်တော်တို့ကလည်း ဒုက္ခမပေးချင်ဘူး သူတို့က ဒီလိုတွေပြောတယ်။ ကျွန်တော်တို့က ခိုင်းလို့လုပ်ရတာ ခိုင်းလို့လာရတာပေါ့။ ရွာမှာလည်း အကြာကြီးမနေနိုင်ဘူး လာလည်း မလာချင်ဘူးပေါ့။ အဲဒီလို ပြောပြီး ညက ၁၁ခွဲကျတော့ ရှို့တာပဲ”ဟု မတ္တရာဒေသခံက ပြောသည်။
Public Service Announcement
စစ်ကောင်စီတပ်သည် ယခင်ကလည်း ကင်းရွာရှိ နေအိမ်အချို့ကို နှစ်ကြိမ် မီးရှို့ဖျက်ဆီးခဲ့ရာ ယခုသည် သုံးကြိမ်မြောက်ဖြစ်သည်။
“ဒီကောင်တွေစကားက ဘာမှအတည်ယူလို့မရဘူး။ ဘာမှလည်း ယုံစားလို့မရဘူး။ ဒီကောင်တွေက မပြေးပါနဲ့ ပြောရင်လည်း ဖမ်းတယ် ရိုက်တယ်။ ပြီးရင်ငွေညှစ်တယ်။ နောက်ဆုံး မသင်္ကာရင် စစ်ကြောရေးပို့ ခံရတယ်။ ရှောင်တဲ့တိမ်းတဲ့အခါကျတော့လည်း ဒီကောင်တွေ ပြောတာက အပြစ်လုပ်ထားလို့ရှောင်တာ။ အပြစ်မလုပ်ထားရင် ဘာမှမဖြစ်ဘူးဆိုတာမျိုး အဲဒီတော့ ဘလောင်းဘလဲ ကလိန်ကကျစ်တွေပဲ” ဟု ဒေသခံက ပြောသည်။
မတ္တရာပြည်သူ့ကာကွယ်ရေးတပ်ဖွဲ့ကလည်း ကင်းရွာမီးရှို့ခံရမှု ဖြစ်စဉ်ကို သတင်းထုတ်ပြန်ခဲ့ရာ စစ်ကား ၁၃စီးဖြင့် ကင်းရွာသို့ နယ်မြေရှင်းလင်းရေး ရောက်ရှိနေသော အကြမ်းဖက်စကစတပ်ဖွဲ့များသည် ၎င်းတို့အပြန်တွင် ကင်းရွာမှနေအိမ် ငါးလုံးကို မီးရှို့ခဲ့ကြောင်း နေအိမ်ပိုင်ရှင်များ၏ အမည်စာရင်း နှင့်တကွ ထုတ်ပြန်သည်။
