ရှမ်းပြည်နယ်မြောက်ပိုင်းနမ့်ဆန်မြို့တွင် ရှေ့တန်းတာဝန်ကျနေသည့် အကြမ်းဖက်စစ်ကောင်စီတပ်ဖွဲ့မှ စစ်သားလေးဦး ထွက်ပြေး၍ တိုင်းရင်းသားလက်နက်ကိုင်အဖွဲ့ TNLA ထံ ခိုလှုံလာခဲ့သည်။
နမ့်ဆန်မြို့နမ့်ခေးရွာထိပ်ရှိ စစ်ကောင်စီတပ်စခန်းမှ စစ်သားလေးဦး ထွက်ပြေးလာခဲ့ခြင်းဟု တအာင်းအမျိုးသားလွတ်မြောက်ရေးတပ်မတော် TNLA နှင့်နီးစပ်သည့် သတင်းရင်းမြစ်တစ်ဦးက People’s Springသို့ ပြောသည်။
” ပြေးလာတာ တစ်ပတ်လောက်ရှိပြီ။ တပ်ထဲမှာ နှိပ်စက်တာတွေ၊ ခွဲခြားဆက်ဆံတာတွေ မခံနိုင်လို့ ပြေးလာတာလို့ ပြောတယ်” ဟု အထက်ပါ သတင်းရင်းမြစ်က ယနေ့(ဧပြီ ၁၀ရက်) ပြောသည်။
လေးဦးစလုံးသည် လက်နက်ခဲယမ်းများကို ထားခဲ့ကာ ထွက်ပြေးလာခဲ့ခြင်းဖြစ်သည်။လတ်တလောတွင် TNLA စောင့်ရှောက်မှုအောက်၌ အန္တရာယ်ကင်းစွာ ရှိနေကြောင်း ယင်းစစ်သားများနှင့် တွေ့ဆုံခဲ့သူတစ်ဦးကပြောသည်။
Public Service Announcement
စစ်ကောင်စီခေါင်းဆောင်များသည့် တပ်ဖွဲ့ဝင်အဆင့်ဆင့်ကို ဖိနှိပ်မှုများ၊ ခွဲခြားဆက်ဆံမှုများနှင့်အယုံအကြည်မရှိဘဲ ရှေ့တန်း၌ အတင်းအကြပ်စေခိုင်းမှုများရှိနေသည်ဟု လေးကေကော်ဒေသစစ်ဆင်ရေးတွင် KNU ထံ ပူးပေါင်းလာသည့် စစ်ကောင်စီအရာရှိအချို့က ၎င်းတို့အတွေ့အကြုံကိုပြောထားသည်။
စစ်တပ်အသိုင်းအဝိုင်းအတွင်းလူမဆန်စွာ အုပ်ချုပ်နေပြီး ပြည်သူလူထုကို သတ်ဖြတ်နေသလို နာမည်ပျက်နေပြီဖြစ်သည့်တပ်မတော်ကို စွန့်ခွာခဲ့ရန် စစ်ကောင်စီတပ်ဖွဲ့ဝင်များအား နယ်ပယ်အသီးသီးက တိုက်တွန်းနေသည်။
ထိုအပြင် နိုင်ငံတစ်ဝန်း စစ်ကောင်စီကို ခုခံတွန်းလှန်စစ်အရှိန်မြှင့်တင်လာခြင်း ၊အကြမ်းဖက်စစ်ကောင်စီ၏ လူမဆန်အောင်ရက်စက်မှုများကြောင့် ဆက်လက်တာဝန်မထမ်းဆောင်လိုတော့သဖြင့် ပြည်သူ့ရင်ခွင်ခိုလှုံလာသောတပ်မတော်သားများလည်း ဆက်တိုက်တိုးလာနေသည်။
