ပုလဲနှင့် မြိုင်မြို့နယ်တို့တွင် စစ်ကြောင်းထိုးနေသော အကြမ်းဖက်စစ်ကောင်စီ တပ်ကို စောင့်ကြိုတိုက်ခိုက်မှုများတွင် ၂၃ဦးသေဆုံးသည်ဟု ပြည်သူ့တော် လှန်ရေးတပ်မတော်ဦးဆောင်သူ ဗိုလ်ဂျပန်က People’s Springသို့ ပြောသည်။
စစ်ကိုင်းတိုင်း ပုလဲမြို့နယ်နှင့် မကွေးတိုင်း မြိုင်မြို့နယ်တို့ရှိ ကျေးရွာပေါင်း ၁၁ရွာကို လှည့်လည်စစ်ကြောင်းထိုးနေသည် အင်အား ၆၄ဦးပါ အကြမ်းဖက် စစ်ကောင်စီတပ်ကို ဧပြီ ၂ ရက်ကစ၍ တိုက်ခိုက်ခဲ့သည်ဟု ဆိုသည်။
“ကျွန်တော်တို့ စခတွေဝင်တဲ့ရွာတွေကို စောင့်ကြည့်တယ်။ပြီးတော့ သူတို့ဘယ် လမ်းကြောင်းက ထွက်လာမယ်ဆိုတဲ့ ဗျူဟာတွေချပြီး စောင့်တိုက်ခဲ့တာ”ဟု ဗိုလ်ဂျပန်က ရှင်းပြသည်။
ယနေ့(ဧပြီ ၁၁ရက်) ကန့်ဒေါင်းရဲစခန်းသို့ စစ်ကောင်စီတပ်သား ၄၁ဦးသာ ပြန်လည်ရောက်ရှိ ခဲ့ပြီး ၎င်းတို့အနက်ရှစ်ဦးသည် ပုလဲမြို့နယ်ဆေးရုံသို့ ပို့ဆောင်ထားရကြောင်းလည်း သိရသည်။
Public Service Announcement
သေဆုံးသွားသော စစ်ကောင်စီတပ်သားများကို ကျေးရွာများရှိနေအိမ်များနှင့် အတူ မီးရှို့ခြင်းနှင့် သဂြိုလ်ခြင်းများပြုလုပ်ခဲ့ကြောင်း PRAက အသိပေးသည်။
ပြည်သူ့တော်လှန်ရေးတပ်မတော်(PRA)မှ တပ်ခွဲပေါင်း ၁၁ခုအထိအသုံးပြုခဲ့ပြီး ပုလဲနှင့် မြိုင်မြို့နယ်များမှ တော်လှန်ရေးအင်အားစုများနှင့် ပူးပေါင်းတိုက်ပွဲဝင် ခဲ့သည်ဟု ဆိုသည်။
တိုက်ပွဲများအတွင်း ဒေသခံပြည်သူ့ကာကွယ်ရေးတပ်ဖွဲ့ဝင် နှစ်ဦးကျဆုံးခဲ့ ကြောင်းလည်း ဗိုလ်ဂျပန်က အတည်ပြုသည်။
