စစ်ကိုင်းတိုင်း တန့်ဆည်မြို့နယ်တောင်ပိုင်းရှိ ကျေးရွာသုံးရွာကို စစ်ကောင်စီတပ်က မေလ ၂၀ရက် နံနက်ပိုင်းကစတင်ပြီး မီးရှို့ဖျက်ဆီးခဲ့ကြောင်း Taze Support Organization-TSO က ထုတ်ပြန်သည်။
မီးရှို့ဖျက်ဆီးခံရသော ကျေးရွာများမှာ ဖန်းခါးဇင်း၊ ချောင်းရိုးနှင့် စိမ်းစားရွာတို့ဖြစ်ပြီး ခပေါင်းကြိုင်ရွာအား မီးရှို့ဖျက်ဆီးခံရခြင်းရှိမရှိ စုံစမ်းအတည်ပြုနေဆဲဖြစ်ကြောင်း TSOက ပြောသည်။
မီးလောင်ဆုံးရှုံးခဲ့သော နေအိမ်အရေအတွက်မှာ ဖန်းခါးဇင်းရှိ အိမ်ခြေ ၂၀၀တွင် အနည်းငယ်ကျန်၊ ချောင်းရိုးရှိ အိမ်ခြေ ၅၀၀တွင် အနည်းငယ်ကျန်ပြီး စိမ်းစားရှိ အိမ်ခြေ ၆၅ လုံးမှာ အားလုံးမီးလောင်ဆုံးရှုံးခဲ့ကြောင်း သိရသည်။
“ဖန်းခါးဇင်၊ ချောင်းရိုး၊ စိမ်းစား ရွာများ အား လုံးရှို့ခံထားရပါတယ်။ အခု တန့်ဆည်နယ်တောင်ပိုင်းကနေစပီး ရွာစဉ်အလိုက်ရှို့လာတာ။ သုံးရွာပြာကျသွားပါပြီ”ဟု TSO အဖွဲ့မှ တာဝန်ရှိသူတစ်ဦးက ပြောသည်။
Public Service Announcement
လက်ရှိတွင် ရေဦး – တန့်ဆည်လမ်းပေါ်ရှိ ဖန်းခါးဇင်း၊ ချောင်းရိုး၊ စိမ်းစားနှင့် ခပေါင်းကျကျေး ရွာများမှ ဒေသခံပြည်သူ ၅,၀၀၀ခန့် ဘေးလွတ်ရာပြေးနေရပြီး အကူအညီများလိုအပ်နေကြောင်း ၎င်းက ဆက်ပြော သည်။
အကြမ်းဖက်စစ်ကောင်စီတပ်များသည် စစ်ကိုင်းတိုင်း တန့်ဆည်မြို့နယ်အတွင်း နေအိမ်များအား မီးရှို့ဖျက်ဆီးလျက်ရှိရာ ပြီးခဲ့သည့် ဧပြီတွင် နေအိမ် ၂၀၆လုံး မီးလောင်ဆုံးရှုံးခဲ့သည်။
