●စစ်ကောင်စီတပ်မှသေဆုံးသူ ၃၀ ခန့်ရှိနိုင်ပြီး အရာရှိ ပါဝင်နိုင်ဟု ဖော်ပြထား
မကွေးတိုင်း ဂန့်ဂေါမြို့နယ် ကျောမြို့မှ ဂန့်ဂေါသို့ ဦးတည်လာသည့် စစ်ကောင်စီ၏ ယာဉ်တန်းကို ဇွန်လ ၂ရက် မနက်က တိုက်ခိုက်ခဲ့ရာ စစ်ကောင်စီတပ်မှ သေဆုံးထိခိုက်များခဲ့ပြီး စစ်ကူလာသည့် ယာဉ်တန်းကိုလည်း ထပ်မံတိုက်ခိုက်ရာ အရာရှိ အပါအဝင် အများအပြားသေဆုံးနိုင်သည်ဟုယောဒေသကာကွယ်ရေးတပ်(YDF)က သတင်းထုတ်ပြန်သည်။
ကျောမြို့ ကာကွယ်ရေးပစ္စည်းစက်ရုံ-ကပစ (၂၃)မှဂန့်ဂေါမြို့သို့ ဦးတည်ချီတက်လာသည့် စစ်ယာဉ်တန်းကို ဇွန်လ ၂ရက် နံနက် ၈နာရီတွင် ပုံညာတောင်တန်းအဆင်း၌ YDF တပ်ရင်း(၁၃) မှ စစ်ကြောင်းမှူး ဦးစီးသည့် တပ်ဖွဲ့ဝင်များက မိုင်း၊ လက်နက်ကြီးတို့ဖြင့် တိုက်ခိုက်ခဲ့ရာစစ်ကောင်စီ ယာဉ်တန်းမှ နောက်ဆုံး (၂) စီး ပျက်ဆီးခဲ့ပြီး စစ်ကောင်စီဘက်မှ တပ်သား (၁၀) ဦး ကျော် သေဆုံးကာ အပြင်းအထန်ထိခိုက်ဒဏ်ရာ ရရှိခဲ့သူများလည်း ရှိခဲ့သည်ဟု ဖော်ပြထားသည်။
ထို့နောက် စစ်ကူလာသည့် စစ်ကောင်စီတပ်မှ ကား ၄စီးကို လည်းမိုင်းဖြင့် တိုက်ခိုက်ခဲ့ကြောင်း၊ စစ်ကောင်စီတပ်များ ဖြန့်ခွဲနေရာမယူခင် လက်နက်ကြီးများဖြင့် တိုက်ခိုက်ခဲ့ရာစစ်ကောင်စီတပ်မှ (၂၀) ခန့် သေဆုံးခဲ့ပြီး အပြင်းအထန် ထိခိုက်ဒဏ်ရာ ရသူများလည်း ရှိခဲ့ကြောင်း YDFက ထုတ်ပြန်သည်။
အဆိုပါတိုက်ပွဲ အပြီးတွင် စစ်ကောင်စီ ရဟတ်ယာဉ်တစ်စီးဖြင့် စစ်ကောင်စီဘက်မှ အလောင်းတစ်လောင်းအား အားချင်း သယ်ယူသွားကြောင်း တွေ့ရှိရသဖြင့် စစ်ကောင်စီဘက်မှ တပ်ရင်းမှူးထက် မနိမ့်သော အဆင့်မြင့်အရာရှိတစ်ဦး သေဆုံးသွားကြောင်း YDFက သုံးသပ်ပြီး ကျန်တပ်သားများကို ရေမျက်နီရွာတွင် သင်္ဂြိုလ်ခဲ့ကြောင်း ဖော်ပြထားသည်။
ထိုကြောင့်တိုက်ပွဲ ၂ ခုအတွင်း စစ်ကောင်စီတပ်မှ ၃၀ကျော် သေဆုံးနိုင်ပြီး YDF ဘက်မှ ထိခိုက်မှုမရှိဟုYDFက ထုတ်ပြန်သည်။သို့သော် စစ်ကောင်စီတပ်သေဆုံးထိ့ခိုက်မှုနှင့်ပတ်သပ်၍ People’s Spring ကသီးခြားအတည်မပြုနိုင်သေးပါ။
စစ်ကောင်စီကယောဒေသတိုက်ပွဲတွင်စစ်သားများသေဆုံးမှုကိုမထုတ်ပြန်ပေ။စစ်ကောင်စီက တိုက်ပွဲများတွင် စစ်သားများသေဆုံးထိခိုက်ပြီး အထိနာလျှင်ထုတ်ပြန်လေ့လည်းမရှိပေ။
ထီးလင်း ပြည်သူ့ကာကွယ်ရေးတပ်(PDF)ကလည်း ယနေ့မနက် ၉နာရီခွဲခန့်တွင် ကျောမြို့ ကပစမှ ထွက်လာသည့် စစ်ကောင်စီယာဉ်တန်းကို တိုက်ခိုက်ခဲ့ရာ စစ်ကောင်စီတပ်မှ သေဆုံးထိခိုက်ရှိနိုင်ကြောင်း ထုတ်ပြန်ထားသည်။ ထိုကြောင့်ထိုယာဥ်တန်းသည်တစ်ရက်တည်း ထီးလင်း PDF နှင့် ထီးလင်းYDF ၏တိုက်ခိုက်မှုခံခဲ့ရခြင်းဖြစ်သည်။