ကရင်ပြည်နယ် မြ၀တီမြို့နယ် ဝေါ်လေမြို့ရှိ စစ်ကောင်စီ၏ ရဲစခန်းကို ကရင်အမျိုးသားကာကွယ်ရေးတပ်(KNDO) နှင့် ပူးပေါင်းတပ်များက ယနေ့နံနက်တွင် သိမ်းပိုက်ခဲ့ကြောင်း ကရင်တိုင်းရင်းသား သတင်းရင်းမြစ်တစ်ဦးက ပြောသည်။
“ဒီမနက် ဝေါ်လေမြို့ရဲစခန်း သူတို့ဝင်သိမ်းတာ လက်နက်ကြီး တစ်လက်နဲ့ လက်နက်ငယ် ၃လက်လားမသိဘူးရတယ်။ ထိခိုက်ကျဆုံးတော့မရှိဘူး။ အသေးစိတ်တော့မသိရသေးဘူး”ဟု ၎င်းက ဆိုသည်။
ရဲစခန်းသိမ်းပိုက်မှုနှင့် ထိခိုက်ကျဆုံးအခြေအနေ အသေးစိတ် မသိရသေးသော်လည်း အင်အားအနည်း ငယ်သာရှိသည့် ဝေါ်လေရဲစခန်းမှ ရဲများသည် စခန်းကို တိုက်ခိုက်ခံရစဉ် စခန်းကို စွန့်ခွာထွက်ပြေးသွားသည်ဟု သိရကြောင်း သတင်းရင်းမြစ်က ပြောသည်။
အဆိုပါ ရဲစခန်းတိုက်ခိုက်သိမ်းပိုက်မှုကို KNDO အထူးကွန်မန်ဒိုတပ်ရင်းမှ ဗိုလ်စလုံးဦးဆောင်သည့် အဖွဲ့နှင့် ပူးပေါင်းတပ်များက ဆောင်ရွက်ခဲ့ခြင်းဖြစ်သည်ဟုဆိုသည်။ ဗိုလ်စလုံးနှင့်အဖွဲ့သည် မကြာသေးမီက ဒီမိုကရေစီအကျိုးပြုကရင်တပ်မတော်(DKBA)မှ KNDO ဘက်သို့ ကူးပြောင်းလာခဲ့သည့် တပ်ဖွဲ့ဖြစ်သည်။