ချင်းပြည်နယ်၊ ဟားခါးမြို့နယ်အတွင်း Non-CDMများ၊ စစ်ကောင်စီသတင်းပေးများနှင့် စစ်အာဏာရှင်မင်းအောင်လှိုင်ထောက်ခံသူများကို မြေယာပိုင်ဆိုင်မှုပေးမည်မဟုတ်ဘဲ ၎င်းတို့ပိုင်ဆိုင်မှုများကို ပြည်လည်သိမ်းယူမည်ဟု CDF(ဟားခါး)ကောင်စီက ယနေ့ထုတ်ပြန်လိုက်သည်။
ဟားခါးမြို့နယ်အတွင်း မြေယာပိုင်ဆိုင်မှုများနှင့်ပတ်သက်ပြီး အများပြည်သူများသိရှိစေရန် Chinland Defense Force –ဟားခါး ကောင်စီ၏ ပထမအစည်း အဝေးဆုံးဖြတ်ချက်အရ ထုတ်ပြန်ခြင်းဖြစ်သည်ဟု ဆိုသည်။
ပြန်လည်သိမ်းယူမည့် သယံဇာတပစ္စည်းများ၊ အိမ်ဝိုင်းမြေ၊ လယ်မြေ၊ ယာမြေ၊ တောင်ယာမြေ၊ ဥယျာဉ်ခြံမြေ၊ မြေလွတ်၊ မြေလပ်၊ မြေရိုင်းများကိုလည်း လိုအပ်သည့်နေရာများတွင် အသုံးပြုသွားမည်ဟုလည်း ထုတ်ပြန်ချက်တွင် ဖော်ပြထားသည်။
ထို့အပြင် စစ်တပ်အာဏာမသိမ်းမီက မြို့နယ်၊ ကျေးရွာ အုပ်စု၊ ကျေးရွာတာဝန်ရှိသူနှင့်အဖွဲ့ဝင်များဖြစ်ပါက အိမ်မြေနေရာတစ်ခုသာ ပိုင်ဆိုင်ခွင့်ရမည်ဟုလည်း ဆိုသည်။
Public Service Announcement
တော်လှန်ရေးကာလအတွင်း သယံဇာတပစ္စည်းများ၊ အိမ်ဝိုင်းမြေ၊ လယ်မြေ၊ ယာမြေ၊ တောင်ယာမြေ၊ ဥယျာဉ်ခြံမြေများကို တရားမဝင် ရောင်းချခြင်း၊ ငှားရမ်းခြင်းနှင့် ပေးကမ်းခြင်းတို့ဆောင်ရွက်ခြင်းမပြုရဟုလည်း CDF(ဟားခါး)ကောင်စီက ထုတ်ပြန်သည်။
ဒေသခံများ လုပ်ကိုင်သည့် လယ်မြေ၊ယာမြေ၊ တောင် ယာမြေနှင့် ဥယျာဉ်ခြံမြေများကိုလည်း အမှန်တကယ်လုပ်ကိုင်သည့် မြေများနှင့် ပိုင်ဆိုင်သည့် အထောက် အထားများရှိမှသာ ခွင့်ပြုမည်ဟု ဖော်ပြထားသည်။ထိုသို့ မရှိပါက အလိုအလျောက်သိမ်းယူမည်ဟုလည်း ထုတ်ပြန်ထားသည်။
၂၀၂၁ဖေဖော်ဝါရီ ၁ ရက်နောက်ပိုင်း မြေယာ အရောင်း အဝယ်ကိစ္စများကို CDF (ဟားခါး)ကောင်စီထံတင်ပြရမည်ဖြစ်ပြီး မတင်ပြပါက အလိုအလျောက်သိမ်းယူပြီးဖြစ်သည်ဟု သတိပေးထားသည်။
ထို့အပြင် လိုက်နာမှုမရှိသည့် အဖွဲ့အစည်းနှင့်ပုဂ္ဂိုလ်များကို ပြင်းပြင်းထန်ထန်အရေးယူဟုလည်း ဆိုသည်။
